Ahmedabad Accident: અમદાવાદના IOC રોડ ચાંદખેડા પર એક ગંભીર માર્ગ અકસ્માત થયો હતો, જેમાં એક લાઇસન્સ વગરના યુવકે તેના મિત્રની બાઇક 70-80 કિ.મી/કલાકની ઝડપે ચલાવીને બાઇકચાલકને પાછળથી ટક્કર મારી હતી. આ જીવલેણ અકસ્માતમાં વિશાલ પારેખ નામના યુવકને માથાના પાછળના ભાગે ગંભીર ઈજા થઈ હતી અને તેને આઠથી દસ ટાંકા આવ્યા હતા, તેમજ તે દસ કલાક સુધી બેભાન અવસ્થામાં હતો. હાલમાં તે હોસ્પિટલના ICU વોર્ડમાં સારવાર મેળવી રહ્યો છે. આરોપી યુવક સામે કડક કાયદાકીય કાર્યવાહીની માંગ કરી છે, જેના સોશિયલ મીડિયા પર 100-150 કિમી/કલાકની સ્પીડના સ્ટંટ વીડિયો હોવાનું સામે આવ્યું છે.
શું હતી ઘટના?
મળતી માહિતી મુજબ, સોમવારે (8 ડિસેમ્બર, 2025) સાંજે IOC રોડ ચાંદખેડા પર ફરી એકવાર રોડ રેજનો ભોગ નિર્દોષ નાગરિક બન્યો હોવાની ઘટના સામે આવી છે. વિશાલ પારેખ જ્યારે પોતાનું બાઇક ચલાવી રહ્યો હતો, ત્યારે પાછળથી પૂરપાટ ઝડપે આવતા બાક ચાલકે તેને જોરદાર ટક્કર મારી હતી. આ ટક્કર એટલી ભયાનક હતી કે, તે જમીન પર પટકાયો અને તેને માથાના પાછળના ભાગે ગંભીર ઈજા પહોંચી હતી અને તેને તાત્કાલિક ધોરણે હોસ્પિટલ ખસેડવાની જરૂર પડી હતી.
આ પણ વાંચોઃ જામનગરના સિક્કામાં સગર્ભા આંગણવાડી વર્કરના મોત બાદ ઉગ્ર રોષ: સુપરવાઈઝર સસ્પેન્ડ, તપાસના આદેશ
અકસ્માત બાદ આઠથી દસ કલાક બેભાન રહ્યો…
અકસ્માત બાદ વિશાલ પારેખે આપેલી માહિતી અનુસાર, આ ઘટના એક જીવલેણ અકસ્માત કહી શકાય. ટક્કરને કારણે મને માથાના પાછળના ભાગે આઠથી દસ જેટલા ટાંકા આવ્યા હતા. અકસ્માતની ગંભીરતા એટલી હતી કે હું લગભગ આઠથી દસ કલાક સુધી બેભાન અવસ્થામાં હતો. હાલમાં, મારા સાથીઓ અને સ્થાનિક મિત્રોએ 108 એમ્બ્યુલન્સ દ્વારા તેમને હોસ્પિટલ પહોંચાડ્યો હતો અને હું હોસ્પિટલના ICU વોર્ડમાં સારવાર હેઠળ છું. મને અડફેટમાં લેનાર બાઇકચાલક યુવક પાસે ડ્રાઇવિંગ લાઇસન્સ પણ નહોતું. તે યુવક તેના મિત્રનું વાહન હાંકી રહ્યો હતો અને અંદાજે 70 થી 80 કિલોમીટર પ્રતિ કલાકની બેફામ ગતિએ બાઇક ચલાવી રહ્યો હતો.
ઇન્સ્ટાગ્રામ પર શેર કરે છે બાઇક સ્ટન્ટના વીડિયો
વધુમાં, તપાસ દરમિયાન વિશાલ પારેખને એ માહિતી મળી છે કે આ યુવકના ઇન્સ્ટાગ્રામ એકાઉન્ટ પર 100થી લઈને 150 કિલોમીટર પ્રતિ કલાકની સ્પીડમાં બાઇક રાઇડના સ્ટન્ટ્સ અને ડ્રીલના વીડિયો નિયમિતપણે જોવા મળતા હતા. આ પ્રકારની જોખમી પ્રવૃત્તિ સ્પષ્ટપણે દર્શાવે છે કે, આરોપી જાહેર રસ્તાઓને રેસ ટ્રેક સમજીને નિર્દોષ નાગરિકોના જીવ જોખમમાં મૂકતો હતો.
આ પણ વાંચોઃ વડોદરામાં હાઇવે પર પોલીસે કાર રોકતા યુ-ટર્ન લઈ ભાગ્યો શખ્સ : સ્પેર વ્હીલમાં છુપાવેલા બિયરના 18 ટીન કબજે
કડક કાયદાકીય કાર્યવાહીની માંગ
વિશાલ પારેખે પીડાદાયક સ્થિતિમાંથી કાયદાકીય કાર્યવાહી માટે ભારપૂર્વક અપીલ કરી છે. તેણે રોષ વ્યક્ત કરતા જણાવ્યું હતું કે,આવા નબીરાઓ સામાન્ય જનતાને હેરાન કરે છે અને તેમનો જીવ જોખમમાં મૂકે છે. મારી નમ્ર વિનંતી છે કે, લાઇસન્સ વગર પૂરપાટ ગતિએ વાહન ચલાવીને જીવલેણ અકસ્માત સર્જનાર આ યુવક સામે તાત્કાલિક અને કડક કાયદાકીય કાર્યવાહી થવી જોઈએ, જેથી આવા બનાવોનું પુનરાવર્તન ન થાય.
આ ઘટના ટ્રાફિક નિયમોના જાહેરમાં ઉલ્લંઘન અને યુવાનોમાં વધતી જતી બેફામ ડ્રાઇવિંગની પ્રવૃત્તિ પર ગંભીર સવાલો ઊભા કરે છે. પોલીસે તાત્કાલિક ધોરણે આ કેસની નોંધ લઈને આરોપી યુવક અને વાહન માલિક બંને સામે ગુનો નોંધીને પગલાં લેવા જોઈએ.
