Amreli Anganwadi Workers: અમરેલી જિલ્લામાં આજે (12મી ફેબ્રુઆરી) આંગણવાડી વર્કર્સ અને હેલ્પરોએ પોતાની પડતર માંગણીઓ અને વિવિધ પ્રશ્નો મુદ્દે સરકાર સામે મોરચો માંડ્યો હતો. અમરેલી અને બગસરા સહિતના વિસ્તારોમાં મોટી સંખ્યામાં આંગણવાડીની મહિલાઓએ એકઠા થઈને દેખાવો કર્યો હતો.
CDPO ને પાઠવ્યું આવેદનપત્ર
રાષ્ટ્રીય ટ્રેડ યુનિયનના આહ્વાન પર 12મી ફેબ્રુઆરીના રોજ આંગણવાડી વર્કરોએ વિવિધ માંગણીઓ સંદર્ભે બાળ વિકાસ યોજના અધિકારી (CDPO)ને આવેદનપત્ર પાઠવ્યું હતું. આ કાર્યક્રમમાં બહોળી સંખ્યામાં મહિલા કાર્યકરોએ હાજર રહીને સરકાર સામે પોતાની હક્કની લડાઈ તેજ કરી હતી.
આંગણવાડીની બહેનોએ આવેદનપત્રમાં રજૂઆત કરી છે કે, નવી ટેકનિકલ એપ્લિકેશન દ્વારા કામમાં વધારો થતા મહિલાઓ પર કામનું ભારણ વધ્યું છે. નવી સિસ્ટમના કારણે આંગણવાડી વર્કરોની માનસિક સ્થિતિ પર અસર પડી રહી હોવાની રજૂઆત કરવામાં આવી છે. વર્ષોથી લટકતી માંગણીઓ ન સંતોષાતા બહેનોમાં ભારે રોષ જોવા મળી રહ્યો છે.
આ પણ વાંચો: પંચમહાલ: ગોધરામાં માનવતા શર્મસાર, કલાલ દરવાજા પાસે પ્લાસ્ટિકની થેલીમાંથી ત્યજી દેવાયેલું ભ્રૂણ મળી આવ્યું
કામથી અળગા રહેવાનો નિર્ણય
જ્યાં સુધી તેમની વ્યાજબી માંગણીઓ સ્વીકારવામાં નહીં આવે ત્યાં સુધી આંગણવાડી વર્કર્સ અને હેલ્પર્સે કામથી અળગા રહેવાનો મહત્ત્વનો નિર્ણય લીધો છે.આંગણવાડી વર્કર્સે સૂત્રોચ્ચાર કરી પોતાની એકતા બતાવી હતી અને સરકાર વહેલી તકે કોઈ હકારાત્મક નિર્ણય લે તેવી આશા વ્યક્ત કરી હતી.
