Cheque Bounce Case Online Payment: ચેક બાઉન્સના કેસોના ભરાવાને લઇ તેના ઝડપી નિકાલ અને ત્વરિત ન્યાયની અનોખી પહેલના ભાગરૂપે આજથી ચેક રિટર્નની તમામ 25 કોર્ટમાં નેગોશીએબલ ઇન્સ્ટ્રુમેન્ટ એકટની કલમ-138 હેઠળના કેસોમાં ઓનલાઇન ચૂકવણીની નવતર સિસ્ટમ અમલી બનાવવામાં આવી છે. સમગ્ર ગુજરાત રાજયમાં સૌપ્રથમ અમદાવાદની ચેક રિટર્નની કોર્ટોમાં આ નવી પઘ્ધતિ લાગુ કરવામાં આવી છે. જેને લઇને હવે જે તે પક્ષકારો તેમના પેમેન્ટના વિવાદ કે તકરારમાં તાત્કાલિક કયુઆર કોડ સ્કેન કરી તરત જ પેમેન્ટ કરી શકશે, જેના કારણે કેસોનો સ્થળ પર જ ઝડપી નિકાલ શકય બનશે.
ચીફ જયુડીશીયલ મેજિસ્ટ્રેટ કોર્ટ, અમદાવાદ શહેરના તાબાની ચેક રિટર્નની તમામ કોર્ટોમાં આ નવતર સીસ્ટમ હાઇકોર્ટના ચીફ જસ્ટિસ સુનિતા અગ્રવાલ અને જસ્ટિસ ઇલેશ વોરાના માર્ગદર્શન હેઠળ શરૂ કરવામાં આવી છે.
અપનાબજાર બિલ્ડિંગની તમામ 25 કોર્ટોમાં નવી સિસ્ટમ લાગુ
અમદાવાદ શહેરના લાલ દરવાજા વિસ્તારમાં અપનાબજાર બહુમાળી બિલ્ડિંગ ખાતે ચેક રિટર્નની કુલ 21 કોર્ટ આવેલી છે, જેમાં 4 ઓનલાઇન કોર્ટ છે, તે મળી કુલ 25 કોર્ટમાં હવે ઓનલાઇન ચૂકવણીની નવી સિસ્ટમ લાગુ થતાં પક્ષકારોનો કિમતી સમય તો બચશે જ પરંતુ પૈસાની ચૂકવણી તાત્કાલિક જ થઇ જવાથી કેસોનો તરત જ નિકાલ લાવી શકાશે.
21 ફિઝિકલ અને 4 ઓનલાઇન કોર્ટમાં હવે પેમેન્ટ કરવું બન્યું સરળ
ચેક રિટર્નના પડતર લાખો કેસોના ઝડપી નિકાલમાં આ નવી સીસ્ટમથી ઘણી મદદ મળી રહેશે. ચેક રિટર્નના કેસોમાં ઓનલાઇન ચૂકવણીની નવી સુવિધાના વિકલ્પ અંગે વાસ્તવમાં સુપ્રીમકોર્ટે એક ચુકાદામાં નિર્દેશ આપ્યા હતા, જેમાં તમામ જિલ્લા અદાલતોને સમન્સના તબક્કે જ આરોપીને ચેકની રકમ ઓનલાઇન ભરપાઇ કરવાનો વિક્લ્પ આપવા પણ નિર્દેશ અપાયો હતો કે જેથી વેળાસર કેસમાં સમાધાાન અને તેના નિકાલની પ્રક્રિયા ઝડપી શકય બને.
બેન્ક ખાતામાં સીધા નાણાં જમા થવાથી વહીવટ બનશે પારદર્શક
આ નવતર પહેલના ભાગરૂપે અમલી બનાવાયેલી સિસ્ટમમાં નેગોશીએબલ ઇન્સ્ટ્રુમેન્ટના કેસોમાં કોઇપણ આરોપી કે પક્ષકાર એસબીઆઇ કલેકટ મારફતે નિર્ધારિત બેન્ક ખાતામાં સીધી ચેકની રકમ જમા કરાવી શકે છે. આ રકમ પ્રાપ્ત થતાંની સાથે જ કોર્ટ બેન્કની પ્રણાલી મારફતે તરત જ લેવડદેવની ચકાસણી, ખરાઇ કરી કેસની સમાધાન અને તેના ત્વરિત નિકાલ અંગે યોગ્ય આદેશ પસાર કરી શકે છે.
આ પણ વાંચો: ગરીબીની ચરમસીમા : 1.22 કરોડ ટન મફત-સસ્તું અનાજ વહેંચી ગુજરાત સરકારે ‘સિદ્ધિ’ મેળવી
કાનૂની પ્રક્રિયાની લાંબી રાહ જોયા વગર વર્ષો જૂના કેસોનો થશે નિકાલ
ઓનલાઇન ચૂકવણીની આ નવી સિસ્ટમ પારદર્શક, સુરક્ષિત અને ઓડિટ ક્ષમતાની ખાતરી સાથેની કહી શકાય. કારણ કે, તમામ લેવડદેવડ કોર્ટના બેન્ક ખાતા મારફતે જ થાય છે. કાનૂની રજિસ્ટરો અને ખાતામાં તેની નોંધણી થાય છે. લાખો પક્ષકારો, હજારો નાણાંકીય સંસ્થાઓ અને કંપનીઓને આ સીસ્ટમનો બહુ મોટો લાભ મળશે. કારણ કે, પેમેન્ટની ચૂકવણી સીધી કોર્ટમાં જમા થશે અને કાનૂની પ્રક્રિયાના વિલંબ વિના જ વર્ષોથી પડતર કેસો આટોપી શકાશે.
દર મહિને અંદાજે 10 થી 15 હજાર નવા કેસો નોંધાય છે
દરમિયાન આ અંગે ગુજરાત બાર કાઉન્સિલની ફાયનાન્સ કમિટીના ચેરમેન અનિલ સી. કેલ્લાએ જણાવ્યું હતું કે, હાલ અમદાવાદ શહેરની ચેક રિટર્નની તમામ 25 કોર્ટમાં આશરે ચાર લાખથી પણ વઘુ કેસો પેન્ડિંગ છે. જેમાં દર મહિને આશરે દસથી પંદર હજાર નવા કેસો દાખલ થતા હોય છે ત્યારે ચેક બાઉન્સના કેસોમાં મુખ્યત્વે વાત પેમેન્ટ નહી ચૂકવવાના વિવાદની જ હોય છે, તેથી આ નવતર ઓનલાઇન ચૂકવણીની સિસ્ટમ આવા વિવાદીત કેસોમાં તાત્કાલિક, ઝડપી અને સ્થળ પર નિકાલ માટે બહુ ઉપયોગી બનશે.
