– પોક્સોના કેસમાં 20 વર્ષની સજા ભોગવી રહેલા શખ્સે જામીન દરમિયાન ફરી દુષ્કર્મ આચર્યું
– કોર્ટ દ્વારા ભોગ બનનાર સગીરાની શારીરિક અને માનસિક સ્થિતિને ધ્યાને રાખી ગુજરાત વિક્ટિમ કોમ્પેસેશન સ્કીમ હેઠળ રૂ. 5 લાખનું વળતર ચૂકવવા જિલ્લા કાનુની સેવા સત્તા મંડળને આદેશ
નડિયાદ, કપડવંજ : કઠલાલમાં સગીરા સાથે દુષ્કર્મ આચરી તેને ગર્ભવતી બનાવવાના કેસમાં કપડવંજની સેશન્સ કોર્ટે (સ્પેશિયલ પોક્સો કોર્ટ) ઐતિહાસિક ચુકાદો આપ્યો છે. અગાઉ પણ આવા જ ગુનામાં ૨૦ વર્ષની સજા ભોગવી રહેલા અને જામીન પર બહાર આવેલા આરોપી રાહુલ ઉર્ફે બોકડો વાંસફોડીયાને કોર્ટે તકસીરવાર ઠેરવીને બાકીની કુદરતી જીંદગી સુધી જેલમાં રહેવા અને પીડિતાને રૂપિયા પાંચ લાખનું વળતર આપવા હુકમ કર્યો છે.
આ કેસની વિગત મુજબ, કઠલાલના ખાડા વિસ્તારમાં રહેતા આરોપી રાહુલ ઉર્ફે બોકડો દિલીપભાઈ વાંસફોડીયાને અગાઉ વર્ષ ૨૦૧૯માં પોક્સોના એક કેસમાં ૨૦ વર્ષની સજા થઈ હતી. આ આરોપી વચગાળાના જામીન પર મુક્ત થયો તે દરમિયાન તેણે ફરીથી ૧૫ વર્ષ અને ૮ માસની સગીરા સાથે દુષ્કર્મ આચર્યું હતું. ૧૧ ફેબુ્રઆરી ૨૦૨૪થી ૮ જાન્યુઆરી ૨૦૨૫ના સમયગાળા દરમિયાન આરોપીએ સગીરાને કઠલાલ રેલવે ફાટક નજીક ઝાડીઓમાં લઈ જઈ બળજબરી કરી હતી અને જાનથી મારી નાખવાની ધમકી આપી હતી. લગ્નની લાલચ આપી વારંવાર દુષ્કર્મ આચરતા સગીરા ગર્ભવતી બની હતી.
આ અંગે કઠલાલ પોલીસ સ્ટેશનમાં ગુનો દાખલ થયા બાદ કેસ કપડવંજ સેશન્સ કોર્ટમાં ચાલવા ઉપર આવ્યો હતો. એ.પી.પી. દ્વારા કોર્ટમાં ૩૧ દસ્તાવેજી પુરાવા અને ૧૩ મૌખિક પુરાવા રજૂ કરવામાં આવ્યા હતા. કોર્ટે પુરાવા અને દલીલોને ગ્રાહ્ય રાખી જણાવ્યું હતું કે, આરોપી અગાઉ પણ આવા જ ગુનામાં દોષિત ઠરેલો હોવા છતાં તેના પર અગાઉની સજાની કોઈ હકારાત્મક અસર થઈ નથી. આવા આદતવશ ગુનેગારને સુધારવાની તક આપવી એ સમાજ માટે જોખમી છે. અદાલતે આરોપીને બી.એન.એસ.ની કલમ ૭૧ મુજબ આજીવન કેદ એટલે કે બાકીના કુદરતી જીવન સુધીની કેદની સજા ફટકારી છે. આ ઉપરાંત કલમ ૮૭ હેઠળ ૪ વર્ષની કેદ અને ૨૫૦૦ રૂપિયાનો દંડ પણ કર્યો છે. તેમજ કોર્ટ દ્વારા ભોગબનનાર સગીરાની શારીરિક અને માનસિક સ્થિતિને ધ્યાને રાખી ગુજરાત વિક્ટિમ કોમ્પેસેશન સ્કીમ હેઠળ પાંચ લાખ રૂપિયાનું વળતર ચૂકવવા જિલ્લા કાનુની સેવા સત્તા મંડળને આદેશ આપવામાં આવ્યો છે.
