No Toll Tax: ગુજરાતમાં દારૂબંધી હોવા છતાં રાજ્ય હવે જાણે નશાના સોદાગરો માટે ‘ખુલ્લું મેદાન’ બની ગયું હોય તેવો ઘાટ સર્જાયો છે. હવાઈ માર્ગ હોય કે રેલવે માર્ગ, ડ્રગ્સ માફિયાઓ માટે જાણે ‘No Toll Tax’ હોય તેમ બેરોકટોક નશાનો સામાન ઘુસાડવામાં આવી રહ્યો છે. છાસવારે કરોડો રૂપિયાનું ડ્રગ્સ અને દારૂ પકડાવાને કારણે ગુજરાત હવે ‘ઉડતા ગુજરાત’ તરીકે ઓળખાવા લાગ્યું છે. રાજ્યમાં યુવા પેઢી, ખાસ કરીને યુવતીઓમાં ડ્રગ્સનું વ્યસન ચિંતાજનક હદે વધી રહ્યું છે.
શહેરના પશ્ચિમ વિસ્તારમાં ડ્રગ્સના સૌથી વધુ બનાવો સામે આવે છે, જ્યારે પૂર્વ વિસ્તારમાંથી આખા શહેરમાં ડ્રગ્સનો કાળો કારોબાર ઓપરેટ થાય છે. ઠેર-ઠેર ગાંજો અને ચરસ પીવાની ચીલમો અને માટીની ભૂંગળીઓનું વેચાણ વધી રહ્યું છે, જે ડ્રગ્સની ભયાનક માંગ તરફ ઈશારો કરે છે. આ દરમિયાન સુરત અને વડોદરામાં થયેલા બે મોટા પર્દાફાશ નશાના નેટવર્કની ગંભીરતા છતી કરે છે.
સુરત એરપોર્ટ: બેંગકોકથી ફ્લાઈટમાં આવેલા પેસેન્જર પાસેથી 3.11 કરોડનો હાઈબ્રિડ ગાંજો કબજે
સુરત ક્રાઈમ બ્રાન્ચ, કસ્ટમ અને CISFના સંયુક્ત ઓપરેશનમાં સુરત ઈન્ટરનેશનલ એરપોર્ટ પરથી કરોડોનો હાઈબ્રિડ ગાંજો ઝડપાયો છે. બે અઠવાડિયા પહેલા મુંબઈના જાફરખાન ઉર્ફે જાફર મોબાઈલવાલા નામના 56 વર્ષીય આધેડને એર ઈન્ડિયાની બેંગકોક-સુરત ફ્લાઈટમાંથી 4.035 કિલો હાઈબ્રિડ ગાંજા સાથે ઝડપી લેવાયો હતો.
આરોપીના રિમાન્ડ દરમિયાન મળેલી બાતમીના આધારે ક્રાઈમ બ્રાન્ચે ફરી તપાસ કરતા ચોંકાવનારી વિગતો સામે આવી હતી. આરોપીએ પોતાની ટ્રોલી બેગના ઉપર-નીચેના પડમાં સિફતપૂર્વક વધુ જથ્થો છુપાવ્યો હતો અને એરપોર્ટ પર સ્કેનરમાં પકડાઈ ન જાય તે માટે ‘કાર્બન પેપર’નો ઉપયોગ કર્યો હતો. બેગ તોડીને તપાસ કરતા તેમાંથી વધુ 4.852 કિલો ગાંજો મળી આવ્યો હતો. આમ, પોલીસે કુલ 8.887 કિલો હાઈબ્રિડ ગાંજો, જેની કિંમત રૂ. 3,11,07,895 થાય છે, તે કબજે કર્યો છે. તપાસમાં આ ડ્રગ્સના તાર મહારાષ્ટ્ર અને તમિલનાડુ સુધી જોડાયેલા હોવાનું ખૂલ્યું છે.
વડોદરા: પુરી-અમદાવાદ એક્સપ્રેસ ટ્રેનમાંથી બિનવારસી ગાંજો મળ્યો
બીજી તરફ, ઓરિસ્સાથી આવતી ટ્રેનોમાં પણ ગાંજાની હેરાફેરી યથાવત છે. વડોદરા રેલવે SOGએ પુરી-અમદાવાદ એક્સપ્રેસમાં ચેકિંગ દરમિયાન એક બિનવારસી બેગમાંથી લાખોનો ગાંજો ઝડપી પાડ્યો છે.
મકરપુરા રેલવે સ્ટેશન પાસેથી પસાર થતી વખતે ટ્રેનના S-3 કોચમાં ટોયલેટ પાસે એક ડાર્ક ગ્રે કલરનો થેલો મળી આવ્યો હતો. આસપાસના મુસાફરોની પૂછપરછ કરતા કોઈ વાલીવારસ મળ્યું ન હતું. પોલીસે થેલો ખોલીને તપાસતા અંદરથી સેલોટેપ અને ગિફ્ટ પેપરમાં વીંટાળેલા 10 પેકેટ મળ્યા હતા, જેમાં તીવ્ર ગંધ મારતો ગાંજો હતો. રેલવે પોલીસે રૂ. 9.93 લાખની કિંમતનો 19.860 કિલો ગાંજો કબજે કરી વડોદરા રેલવે પોલીસ સ્ટેશનમાં ગુનો નોંધી વધુ તપાસ હાથ ધરી છે.
પોલીસની લાચારી: સરકારી પંચો માટે રઝળપાટ
વડોદરા રેલવે પોલીસ દ્વારા ગાંજાનો કેસ કરવા માટે સરકારી પંચો (સાક્ષીઓ) મેળવવા ભારે જહેમત ઉઠાવવી પડી હતી. NDPS એક્ટ મુજબ પંચનામું કરવા માટે પોલીસે વન વિભાગ, GPCB, સેન્ટ્રલ લાયબ્રેરી અને આઈટીઆઈ જેવી સરકારી કચેરીઓના અધિકારીઓનો સંપર્ક કર્યો હતો, પરંતુ કોઈએ સહકાર આપ્યો ન હતો. અંતે, પોલીસને ખાનગી પંચોની મદદ લઈને કાયદેસરની કાર્યવાહી કરવાની ફરજ પડી હતી. આ ઘટના સરકારી તંત્ર વચ્ચેના સંકલનનો અભાવ પણ છતો કરે છે.
