સરકારના શ્રમ, કૌશલ્ય વિકાસ અને રોજગાર વિભાગે ગિગ અને પ્લેટફોર્મ કામદારોના હિત માટે ટાસ્કફોર્સની રચના કરી છે. જે કામદારોના હિતમાં નીતિ નિયમોમાં સુધારા માટે રૂપરેખા તૈયાર કરશે. ગુજરાત રાજ્યમાં શહેરીકરણ અને ટેકનોલોજીના વધતા ઉપયોગને
કારણે ગિગ(થોડાં સમય માટે અને કામચલાઉ ધોરણે જુદા જુદા પ્રોજેક્ટ ઉપર કામ કરતાં કારીગરો) અને પ્લેટફાર્મ (ઓનલાઈન પ્લેટફોર્મ ઉપર વિવિધ સેવાઓ પૂરી પાડતી કંપનીઓમાં કામ કરતાં કર્મચારીઓ) કામદારોની સંખ્યા ઝડપથી વધી રહી છે. ગિંગ અને પ્લેટફોર્મ કામદારોને તેમની કાર્યપદ્ધતિ પરંપરાગત ન હોવાને કારણે સામાજિક સુરક્ષા યોજનાઓ અને શ્રમ કાયદાઓ હેઠળના લાભો મળતા નથી. તેમજ આ કામદારોને આવકની અનિશ્ચિતતા, કામના કલાકો, માર્ગ અકસ્માતો જેવી સમસ્યાઓનો સામનો કરવો પડે છે. ગીગ અને પ્લેટફોર્મ કામદારો પૈકી ફૂડ ડિલિવરી, ઓટો/કેબ ડ્રાઈવર્સ, ઘરગથ્થુ સેવા આપનાર, ઓનલાઈન ટ્યુટર્સ અને ફ્રીલાન્સર્સ વગેરે કેટેગરીમાં કામ કરતાં કામદારોનું કામનું સ્વરૂપ, સમય, આવક તેમજ કામ દરમ્યાન ઉપસ્થિત થતી મુશ્કેલીઓમાં પણ ખૂબજ તફાવત જોવા મળેછે. જેથી ગિંગ અને પ્લેટફોર્મ કામદારોના કલ્યાણ માટે ટાસ્કફોર્સની રચના કરવામાં આવી છે. અગ્ર સચિવ, શ્રમ, કોશલ્ય વિકાસ અને રોજગાર વિભાગના અધ્યક્ષ સ્થાને ૯ સભ્યોની ટીમની રચના કરવામાં આવી છે. જેમાં ગિંગ કામદારોના તથા ગિંગ ક્ષેત્રના માલિકોના સરકાર દ્વારા નિયુક્ત કરેલ બે-બે પ્રતિનિધિઓ નો પણ સમાવેશ કરાયો છે. ટાસ્કફોર્સ ગિંગ કામદારોના હિતમાં નીતિ અંગે રજૂઆત અને ભલામણ તૈયાર કરવી, સામાજિક સુરક્ષા, ઈન્સ્યોરન્સ, આરોગ્ય અને પેન્શન જેવી સુવિધાઓ માટે સૂચન આપવા, પ્લેટફોર્મ કામદારો સંબંધિત સમસ્યાઓનું નિરાકરણ લાવવું, પ્લેટફોર્મ આધારિત રોજગારીના નીતિનિયમોમાં સુધારા માટે રૂપરેખા તૈયાર કરશે.
