Ahmedabad News: ગુજરાતની આર્થિક સ્થિતિ પરના તાજેતરના ઓડિટ અહેવાલ મુજબ રાજ્યએ વિકાસના નવા સીમાચિહ્નો સર કર્યા છે. વર્ષ 2024-25 દરમિયાન ગુજરાતની આર્થિક પરિસ્થિતિમાં થયેલા સુધારા અને વિકાસના આંકડા રાજ્યની મજબૂત અર્થવ્યવસ્થા રજુ કરે છે. અહેવાલના મુખ્ય મુદ્દો ગુજરાતની માથાદીઠ આવકમાં થયેલો 9.10% નો વધારો છે, જે ગત વર્ષની સરખામણીએ રાજ્યની સમૃદ્ધિમાં વધારો સૂચવે છે.
કેન્દ્ર કરતા ગુજરાતનો વિકાસ દર વધુ
નાણાકીય વર્ષ 2024-25 દરમિયાન ગુજરાતનું એકંદર ઘરેલું ઉત્પાદન (GSDP) 10.15% નોંધાયું છે. રસપ્રદ વાત એ છે કે, આ સમયગાળા દરમિયાન કેન્દ્ર સરકારનું એકંદર ઘરેલું ઉત્પાદન (GDP) 9.78% રહ્યું હતું. આમ, કેન્દ્રના સરેરાશ વિકાસ દર કરતા ગુજરાતનો વિકાસ દર ઘણો આગળ રહ્યો છે. છેલ્લા પાંચ વર્ષમાં ઘરેલું ઉત્પાદનમાં વધઘટ જોવા મળી છે, જે 14.07% થી ઘટીને વર્તમાન સ્તરે પહોંચ્યું છે.
નાણાકીય શિસ્ત અને રાજકોષીય ખાધ
રાજ્ય સરકારે દેવું નિયંત્રિત કરવાના અસરકારક પ્રયાસો કર્યા છે. 2024-25 માં ગુજરાતની રાજકોષીય ખાધ 1.81% રહી છે, જે નિયત મર્યાદાની અંદર છે. નાણાકીય વર્ષ 2023-24માં રાજ્યનો કુલ ખર્ચ રૂ. 2,47,631.56 કરોડ હતો. જે 2024-25 માં 8.46% વધીને રૂ. 2,68,591.47 કરોડ થયો છે. આ વધારા છતાં રાજ્યએ રૂ. 18,942.42 કરોડની મહેસૂલી પુરાંત પ્રાપ્ત કરીને નાણાકીય સ્થિરતા જાળવી રાખી છે.
મૂડી ખર્ચમાં મોટો ઉછાળો
વિકાસના કામો પાછળ થતા મૂડી ખર્ચમાં રાજ્યએ ગત વર્ષની સરખામણીએ 17.51% ની વૃદ્ધિ નોંધાવી છે. કુલ ખર્ચના 24.36% એટલે કે રૂ. 65,428 કરોડ સરકારે મૂડી ખાતા પર ખર્ચ કર્યા છે. આ આંકડા દર્શાવે છે કે સરકાર ઇન્ફ્રાસ્ટ્રક્ચર અને લાંબા ગાળાની સંપત્તિ નિર્માણ પર વધુ ધ્યાન આપી રહી છે.
અન્ય મહત્ત્વના નાણાકીય આંકડા
વ્યાજ ખર્ચ: મહેસૂલી આવક સામે વ્યાજ ખર્ચ 12.82% સુધી સીમિત રાખવામાં સફળતા મળી છે.
જાહેર ઋણ: જાહેર ઋણ રૂ. 51,253 કરોડ સામે મૂડી ખર્ચ 12.76% નોંધાયો છે.
ગુજરાત સરકારના નાણાકીય લેખા-જોખા પરથી એટલું સમજી શકાય છે કે, રાજ્ય સતત વિકાસ તરફ અગ્રેસર છે. માથાદીઠ આવકમાં વધારો અને મજબૂત જીડીપી વૃદ્ધિ દર સાથે ગુજરાત ભારતના આર્થિક વિકાસના ગ્રોથ એન્જિન તરીકેની પોતાની ભૂમિકા સુદ્રઢ કરી રહ્યું છે.
