પાદરા તા.૫ વડોદરા જિલ્લાના પાદરા તાલુકાના જાસપુર પાસે એક ઘરના આંગણામાં ગાંજાના વાવેતર બાદ તેનું છૂટક વેચાણ કરતા વૃધ્ધને જિલ્લા પોલીસે ઝડપી પાડી ગાંજાનો જથ્થો, ગાંજાના બીજ સહિતનો મુદ્દામાલ કબજે કર્યો હતો.
પ્રાપ્ત માહિતી મુજબ લખડીકુઇ તાબે જાસપુરમાં રહેતો ચંદુ ઝીણાભાઇ જાદવ પોતાના ઘરમાં ગાંજો રાખી તેનું છૂટક વેચાણ કરે છે તેવી માહિતીના આધારે જિલ્લા એસઓજીએ ગઇ સાંજે દરોડો પાડયો હતો. ઘરમાં તપાસ કરતાં એક મિણીયા થેલામાં ગાંજાનો જથ્થો તેમજ ગાંજાના બીજ મળ્યા હતાં. પોલીસે ઘરમાં હાજર ચંદુની પૂછપરછ કરતા જાણવા મળ્યું હતું કે એક વર્ષ પહેલા ગામમાં વડલા નીચે જે લોકો ગાંજો પીતા હતા તેમણે ફેકેલા બીજ ઘેર લાવીને ઘરની સામે ખુલ્લી જગ્યામાં ગાંજો વાવ્યો હતો અને તે ઊગીને છોડ થયા બાદ તેના પાંદડા તોડીને ગાંજો ભેગો કર્યો હતો અને તેમાંથી થોડા બીજ અલગ કરી પ્લાસ્ટિકની થેલીમાં ભર્યા છે.
પોલીસે જણાવ્યું હતું કે ચંદુના ઘરમાંથી ૧ કિલો ૩૫ ગ્રામ ગાંજો, ૨૨૦ ગ્રામ ગાંજાના બીજ તેમજ ગાંજાના વેચાણ માટે રાખેલી ૪૫૦ નંગ પ્લાસ્ટિકની નાની થેલીઓ અને રોકડ મળી કુલ રૃા.૬૨૮૫૦નો મુદ્દામાલ કબજે કર્યો હતો. પોલીસે એનડીપીએસ એક્ટ મુજબ ચંદુ જાદવની ધરપકડ કરી વધુ તપાસ હાથ ધરી છે.
