CRPF Vehicle Accident in Udhampur: જમ્મુ-કાશ્મીરના ઉધમપુર જિલ્લામાં એક મોટો અકસ્માત થયો છે. આજે સવારે લગભગ 10:30 વાગ્યે બસંતગઢના કંડવા વિસ્તારમાં CRPFની એક ટ્રક બેકાબૂ થઈને લગભગ 200 ફૂટ ઊંડી ખીણમાં ખાબકી હતી. આ અકસ્માતમાં 3 જવાનો શહીદ થયા છે અને 15 ઈજાગ્રસ્ત થયા છે. તેમજ ઈજાગ્રસ્તોની હાલ હોસ્પિટલમાં સારવાર ચાલી રહી છે, જેમાંથી કેટલાકની હાલત ગંભીર છે.
ઘટનાસ્થળે પહોંચીને તરત જ બચાવ કામગીરી શરૂ કરવામાં આવી હતી
આ અકસ્માત અંગે જાણકારી આપતા ઉધમપુરના એસપીએ કહ્યું છે કે, પોલીસ અને રાહત ટીમ ઘટનાસ્થળે પહોંચીને તરત જ બચાવ કામગીરી શરૂ કરી હતી. અકસ્માતનું કારણ ખરાબ રસ્તો અથવા ટ્રકમાં કોઈ ટેકનિકલ ખામી હોવાનું માનવામાં આવી રહ્યું છે.
આ પણ વાંચો: ભારતે ટ્રમ્પની દુ:ખતી રગ દબાવી! રશિયા સાથે ઈલેક્ટ્રિક વાહનો અને ક્લિન એનર્જી માટે જરૂરી ખનીજોની ડીલ
જવાનો બસંતગઢથી પરત ફરી રહ્યા હતા
અધિકારીઓએ જણાવ્યું કે, ‘ગુરુવારે જમ્મુ-કાશ્મીરના ઉધમપુર જિલ્લામાં સેન્ટ્રલ રિઝર્વ પોલીસ ફોર્સ (CRPF)ની ટ્રક રસ્તા પરથી સ્લીપ થઈને ખીણમાં પડી ગઈ. આ દુર્ઘટનામાં ત્રણ જવાનો શહીદ થયા અને 15 ઘાયલ થયા. આ ઘટના સવારે લગભગ 10:30 વાગ્યે કંડવા વિસ્તારમાં બની. તે સમયે જવાનો બસંતગઢથી એક ઓપરેશન કરીને પરત ફરી રહ્યા હતા. વાહનમાં અર્ધલશ્કરી દળની 179મી બટાલિયનના જવાનો સવાર હતા.’
