જામનગર નજીક જાંબુડા પાટીયા પાસે બોલેરો પિકપ વેન અને બાઈક વચ્ચે અકસ્માત સર્જાયો હતો, જેમાં બાઈક પર સવાર બે યુવાનોને ગંભીર ઇજા થવાથી સારવાર માટે હોસ્પિટલમાં ખસેડાયા છે. પોલીસે બોલેરો ચાલક સામે ગુનો નોંધ્યો છે.
જામનગર નજીક દરેડ વિસ્તારના બે બાઈક સામસામે અથડાઈ પડતાં એક બાઈક સવાર યુવાનને ગંભીર ઈજા થઈ છે, અને જી.જી. હોસ્પિટલમાં સારવાર ચાલી રહી છે.
અકસ્માતનો પ્રથમ બનાવ જામનગર નજીક જાંબુડા ચોકડી થી અલીયા ગામ તરફ જવાના માર્ગે બન્યો હતો. ત્યાંથી ડબલ સવારી બાઈકમાં બેસીને મજલીસ ના કાર્યક્રમમાં જઈ રહેલા જામનગરના રેહાન મુસાભાઈ (ઉંમર વર્ષ 22) તેમજ હસન રઝાક અસગરભાઈ કે જેઓ જાંબુડા પાટીયા પાસેથી પસાર થઈ રહ્યા હતા, દરમિયાન તેઓના બાઈકને જી.જે. 10 ટી.એક્સ. 1448 નંબરની બોલેરો પીકપ વેનના ચાલકે ઠોકરે ચડાવતાં બંને યુવાનો ગંભીર સ્વરૂપે ઘાયલ થયા છે, જેઓની જામનગરની સરકારી જી.જી. હોસ્પિટલમાં સારવાર ચાલી રહી છે. પોલીસે બોલેરો વેન ના ચાલક સામે ગુનો નોંધ્યો છે. જે હાલ ભાગી છૂટ્યો હોવાથી તેની શોધખોળ ચલાવવામાં આવી રહી છે.
અકસ્માતનો બીજો બનાવ જામનગર નજીક દરેડ વિસ્તારમાં બન્યો હતો. જ્યાંથી પોતાનું બાઈક લઈને પસાર થઈ રહેલા જામનગરના વતની હિતેશ ઉમેદભાઈ ઝંડારિયાને સામેથી પુરપાટ ઝડપે આવી રહેલા એક અજાણ્યા બાઈકના ચાલકે ટક્કર મારી દેતાં પોતે નીચે પટકાઈ પડ્યા હતા, અને હાથ ના ભાગે ફેક્ચર સહિતની ઈજા થઈ હોવાથી જામનગરની સરકારી જી.જી. હોસ્પિટલમાં સારવાર લેવી પડી છે પોલીસે અજાણ્યા વાહનચાલક સામે ગુનો નોંધી તેની શોધખોળ હાથ ધરી છે.
