વડોદરા, તા.4 વડોદરા જિલ્લામાં પાંચ સ્થળે હિટ એન્ડ રનની પાંચ ઘટનામાં પાંચ વ્યક્તિના મોત નિપજ્યા હતાં.
વડોદરા નજીક પોર પાસેના નેશનલ હાઇવે પર પૂરપાટઝડપે જતા એક અજાણ્યા વાહને ગઇ રાત્રે જોરદાર ટક્કર મારતા રોડ ક્રોસ કરતા મોહનસિંહ ઉત્તમસિંહ ચૌહાણ (ઉ.વ.૫૬)નું મોત નિપજાવ્યું હતું. અકસ્માત બાદ વાહન લઇને ચાલક ફરાર થઇ ગયો હતો. વરણામા પોલીસે ગુનો નોંધી વધુ તપાસ હાથ ધરી છે.
અન્ય બનાવમાં વાઘોડિયા તાલુકાના ચંપાલીયાપુરા ગામની સીમમાં આજવા-વડોદરારોડ પર પૂરઝડપે જતી એક કારે બાઇકને ટક્કર મારતા બાઇક ચાલક ૨૦ વર્ષના વિક્રમ જાગાભાઇ ભરવાડ (રહે.ભરવાડવાસ, રવાલ)નું મોત નિપજ્યું હતું જ્યારે બાઇક પર સવાર મેહુલ રામાભાઇ ભરવાડ (ઉ.વ.૧૭)ને ઇજા થતાં તેને સારવાર માટે ખસેડાયો છે. અકસ્માત બાદ કાર મૂકીને ચાલક ફરાર થઇ ગયો હતો.
સાવલી તાલુકાના સમલાયા-વેમારરોડ પર અજાણ્યા વાહનને અડફેટમાં લેતા ચાલતા જતા ૫૯ વર્ષના ધીરુભાઇ મનસુખભાઇ રાઠોડિયા (રહે.કમલાપુરા, તા.વાઘોડિયા)નું મોત નિપજ્યું હતું. પોલીસે અજાણ્યા વાહનની શોધખોળ હાથ ધરી છે.
ડભોઇ-વડોદરારોડ પર કુંઢેલા ગામની સીમમાં એક ઇકો ગાડીએ ટક્કર મારતા મોપેટ ચાલક ૫૭ વર્ષના સલીમ કરીમ મન્સુરી (રહે.પીપળસટ ગામ, તા.સંખેડા)નું મોત નિપજ્યું હતું. અકસ્માતના આ બનાવમાં પાદરા તાલુકાના માસરરોડ પર એકતા હોટલ સામે પૂરઝડપે જતી એક ટ્રકે રોડ ક્રોસ કરતા ભગવાન ઉર્ફે ભગો હરમાન પઢિયાર (ઉ.વ.૪૮)ને અડફેટમાં લેતા તેમનું મોત નિપજ્યું હતું.
