Vadodara Traffic Police : વડોદરા શહેરના ટ્રાફિક વિભાગના એસીપી પ્રમોશન સાથે ફરી વડોદરામાં જ ડીસીપી તરીકે મુકાતા વડોદરા શહેર પોલીસ વિભાગમાં તમામ હોદ્દા 100 મીટરની રેન્જમાં મેળવવાનો એક રેકોર્ડ કહી શકાય તેવો કિસ્સો વડોદરા પોલીસમાં ચર્ચામાં રહ્યો છે.
સામાન્ય રીતે પોલીસ વિભાગમાં દર ત્રણ વર્ષે બદલી અને પ્રમોશન સાથે ટ્રાન્સફર થતી હોય છે. પરંતુ 1996માં પીએસઆઇ તરીકે કારેલીબાગ પોલીસ સ્ટેશનમાં ફરજ બજાવતા જે.આઈ.વસાવાએ પ્રમોશન મળ્યા બાદ આજ પોલીસ સ્ટેશનમાં પીઆઇ તરીકે પણ ફરજ બજાવી હતી.
ત્યારબાદ તેમને એસઓજીના પીઆઇ તરીકે મુકાયા તે પોલીસ સ્ટેશન પણ કારેલીબાગ પોલીસ સ્ટેશનની સામે જ કાર્યરત હતું. ત્યાર પછી તેમની બદલીઓ થતી રહી હતી. ફરી એસીપી તરીકે પ્રમોશન મળ્યું ત્યારે વડોદરામાં ટ્રાફિક વિભાગમાં તેમને મૂકવામાં આવ્યા હતા. જે ઓફિસ કારેલીબાગ પોલીસ સ્ટેશનને અડીને આવેલી છે. હવે અહીં તેમને ડીસીપી તરીકે પ્રમોશન મળ્યું છે અને ટ્રાફિક વિભાગનો ચાર્જ સોંપવામાં આવ્યો છે. જે ઓફિસ કારેલીબાગ પોલીસ સ્ટેશનની નજીકમાં જ છે.
