જરોદ તા.૧૨ હાલોલ-વડોદરા સ્ટેટ હાઇવે પર આમલીયારા ગામ પાસેથી જિલ્લા પોલીસે એક કન્ટેનરમાં ટ્રેક્ટરના સ્પેર પાર્ટસની આડમાં થતી દારૃની હેરાફેરીનું નેટવર્ક ઝડપી પાડી રાજસ્થાનના એક શખ્સની ધરપકડ કરી રૃા.૪૬.૩૦ લાખના દારૃના જથ્થા સહિત કુલ રૃા.૨.૮૨ કરોડનો મુદ્દામાલ કબજે કર્યો હતો.
હાલોલ તરફથી એક કન્ટેનરમાં દારૃનો જથ્થો ભરીને તે વડોદરા તરફ આવે છે તેવી માહિતી જિલ્લા એલસીબીને મળી હતી જેના પગલે ગઇ રાત્રે સ્ટેટ હાઇવે પર આમલીયારા બસ સ્ટેન્ડ પાસે વોચ ગોઠવી હતી. દરમિયાન બાતમી મુજબનું એક કન્ટેનર ટ્રક આવતા તેને રોકી તપાસ હાથ ધરી હતી. ડ્રાઇવરની પૂછપરછ કરતાં તેણે ટ્રેક્ટરના સ્પેર પાર્ટસ હોવાનું જણાવ્યું હતું.
ડ્રાઇવરને સાથે રાખી પોલીસે કન્ટેનર ખોલાવતા પ્રથમ અંદર સ્પેરપાર્ટસ જણાયા હતાં ત્યારબાદ વધુ તપાસ કરતા દારૃની પેટીનો જથ્થો મળ્યો હતો. પોલીસે રૃા.૪૬.૩૦ લાખ કિંમતનો દારૃનો જથ્થો, રૃા.૨.૨૧ કરોડની કિંમતના ટ્રેકટરના સ્પેરપાર્ટસ તથા ટેલીકોમ ઇક્વિપમેન્ટ ભરેલા બોક્સો, રોકડ, મોબાઇલ તેમજ કન્ટેનર ટ્રક કબજે કર્યા હતાં. દારૃના જથ્થાની હેરાફેરી કરનાર અમીનખાન બાગડખાન (રહે.જોધપુર, રાજસ્થાન)ની ધરપકડ કરી દારૃનો જથ્થો કોણે મોકલ્યો અને ક્યાં મોકલવાનો હતો તે દિશામાં પોલીસ દ્વારા વધુ તપાસ હાથ ધરાઇ છે.
