વડોદરા,દુપટ્ટો બદલી નહીં આપતા દુકાનદાર સાથે ઝઘડો કરી માર મારનાર સામે પોલીસે ગુનો દાખલ કરી તપાસ હાથ ધરી છે.
અકોટા ચાર રસ્તા પાસે મહાત્મા ગાંધી હાઇટ્સમાં રહેતા રિષભભાઇ મહેન્દ્રભાઇ ગુપ્તાની માંડવી બેન્ક રોડ પર કપડાની દુકાન છે.સિટિ પોલીસ સ્ટેશનમાં તેમણે ફરિયાદ નોંધાવી જણાવ્યું છે કે, ગઇકાલે સાંજે સાત વાગ્યે હું મારી દુકાન પર હતો. તે દરમિયાન એક દંપતી આવ્યું હતું. તેમણે મારા નાના ભાઇને દુપટ્ટો બદલી આપવાનું કહેતા મારા ભાઇએ બિલ માંગ્યું હતું. પરંતુ, તેઓએ કહ્યું કે, અમારી પાસે બિલ નથી. દુપટ્ટો તમારી દુકાનેથી જ લીધો છે. મારા ભાઇએ બિલ નહી હોવાથી દુપટ્ટો બદલી આપવાની ના પાડી હતી. મહિલાના પતિએ ઉશ્કેરાઇને દુકાનમાં અંદર આવીને મારા ભાઇને માર માર્યો હતો.હું તથા મારા પિતા તેને છોડાવવા જતા હુમલાખોરે ફોન કરીને તેના મિત્રોને બોલાવ્યા હતા.તેઓએ પણ અમારી સાથે ઝઘડો કર્યો હતો.
