– ગઢડાના નીંગાળા ગામે પોણા 8 વર્ષ પૂર્વે બનેલા બનાવમાં ચુકાદો
– 14 સાક્ષીને તપાસવામાં આવ્યા, 40 દસ્તાવેજી પુરાવા રજૂ થયા
બોટાદ : બોટાદ જિલ્લાના ગઢડા તાલુકાના નીંગાળા ગામે આવેલા પેટ્રોલપંપ પર લૂંટ-ધાડના ચકચારી કેસમાં બોટાદ કોર્ટે ત્રણ શખ્સને સાત-સાત વર્ષ સખત કેદની સજા અને રોકડ રકમનો દંડ ફટકાર્યો છે.
પ્રાપ્ત માહિતી અનુસાર ગઢડના નીંગળા ગામે આવેલ હીમાલય પેટ્રોલપંપમાં ગત તા.૩૧-૫-૨૦૧૮ના રોજ મધરાત્રિના સમયે કરશભાઈ મંગાભાઈ સાનિયા (રહે, જીંજાવદર) અને વશરામભાઈ પુનાભાઈ પરમાર નામના બે કર્મચારી ઓફિસની આગળ ખાટલામાં સૂતા હતા. આ સમયે ત્રણ અજાણ્યા શખ્સે ધસી આવી બન્નેને લાકડીથી માર મારી ફ્રેક્ચરની ગંભીર ઈજા પહોંચાડી ઓફિસની ચાવી માંગી હતી. જેથી ચાવી આપવાની ના પાડતા ત્રણેય લૂંટારુંએ કરશનભાઈ અને વશરામભાઈને લાકડીના ઠોસા મારી બાથરૂમમાં પૂરી દઈ ઓફિસના કચ તોડી લોખંડના કબાટમાંથી રૂા.૪૫,૦૦૦ રોકડા, સીસીટીવીનું ડીવીઆર લઈ ગયા હતા. જે બનાવ અંગે ગઢડા પોલીસે આઈપીસી ૩૯૪, ૩૯૭ સહિતની કલમ હેઠળ ગુનો દાખલ કરી તપાસનો ધમધમાટ આદરી વિસુ ઉર્ફે નાનુ ચંદુભાઈ જીલિયા, હરેશ ઉર્ફે ભુરી ચંદુભાઈ જીલિયા અને ઘનશ્યામ ઉર્ફે અંગી બચુભાઈ વાઘેલા નામના શખ્સોની ધરપકડ કરી હતી. આ અંગેનો કેસ બોટાદ ડિસ્ટ્રીક્ટ એન્ડ સેશન્સ કોર્ટમાં ચાલી જતાં ૧૪ સાક્ષીને તપાસવામાં આવ્યા હતા. તેમજ ૪૦ દસ્તાવેજી પુરાવા અને જિલ્લા સરકારી વકીલ કે.એમ. મકવાણાની અસરકારક દલીલો, રજૂઆતોને ગ્રાહ્ય રાખી ન્યાયમૂર્તિ એમ.જે.પરાશરે ત્રણેય આરોપી વિસુ ઉર્ફે નાનુ, હરેશ ઉર્ફે ભુરી અને ઘનશ્યામ ઉર્ફે અંગીને કસુરવાન ઠેરવી સાત-સાત વર્ષ સખત કેદની સજા અને દંડનો હુકમ કર્યો છે.
