– અસામાન્ય સલામતી વચ્ચે
– 23મી ભારત-રશિયા શિખર પરિષદ નિમિત્તે રશિયન પ્રમુખ ભારત આવ્યા છે : નરેન્દ્ર મોદીએ ‘અંગત’ ભોજન સમારંભ યોજ્યો
નવી દિલ્હી : રશિયાના પ્રમુખ વ્લાદીમીર પુતિન આજે સાંજે મોસ્કોથી અહીં આવી પહોંચ્યા છે. તેઓનું વિધિવત સ્વાગત તો આવતીકાલે યોજાવાનું છે પરંતુ તે પૂર્વે આજે સાંજે ઉતરીને રાષ્ટ્રપતિ ભવનની જમણી બાજુએ રહેલા હૈદરાબાદ હાઉસ ખાતે વડાપ્રધાન નરેન્દ્ર મોદી સાથે અનૌપચારિક મંત્રણા યોજી હતી, તે પછી તેઓને વડાપ્રધાન મોદી અંગત ભોજન આપવાના છે. આવું અંગત ભોજન પ્રમુખ પુતિને વડાપ્રધાન મોદી માટે યોજયું હતું. તેના પગલે મોદી પણ પુતિન માટે અંગત ભોજન સમારંભ યોજયો હતો. આ ભોજન સમારંભ અનૌપચારિક હોવા છતાં તે સહજ છે કે બંને તે દરમિયાન મહત્વના મુદ્દાઓની ચર્ચા કરી સાથે ઔપચારિક મંત્રણા સમયે કઈ બાબતો કેન્દ્રમાં રાખવી તે વિષે પણ વાતચીત થઈ ઉલ્લેખનીય છે કે પ્રમુખ પુતિન અંગ્રેજી સારી રીતે જાણે છે. તેથી ચર્ચા સરળ બની રહેલી.
આ પછી શુક્રવારે સવારે પ્રમુખ પુતિનનું ગાર્ડ ઓફ ઓનર સાથે વિધિવત સ્વાગત કરાશે. તે પછી તેઓ પરંપરા પ્રમાણે રાજઘાટ પહોંચી પૂ. બાપુની સમાધિ ઉપર પુષ્પમાળા ચઢાવશે. પછી તેઓ હૈદરાબાદ હાઉસ ખાતે યોજાનારી ૨૩મી ભારત-રશિયા શિખર પરિષદમાં તેઓના પ્રતિનિધિ મંડળ સાથે ઉપસ્થિત રહેશે.
આ મંત્રણા દરમિયાન ભારતના રશિયા સાથે થયેલા શસ્ત્ર સરંજામના સોદા તે શસ્ત્ર સરંજામ વહેલી તકે ભારતમાં પહોંચાડવા માટે અનુરોધ કરશે. આ સોદાઓ તો છેક ૨૦૧૯ પહેલા થયા હતા. પરંતુ હજી તે પ્રમાણે ડીલીવરી મળી નથી. તેનું મહત્વનું કારણ યુક્રેન યુદ્ધ છે.
ભારત-રશિયા કરારો પ્રમાણે ભારત રશિયા પાસેથી એસ-૪૦૦ પ્રકારની પ્રબળ એર ડીફેન્સ સીસ્ટીમ્સ, ૫ બિલિયન ડોલર્સના ખર્ચે ખરીદવાનું છે. જો કે આ સોદો ૨૦૧૯માં થયો હતો. તેનો અમલ કરવા ભારત અનુરોધ કરશે. તે પ્રમાણે બીજી પાંચ સ્કવોડ્રન્સ, ભારતને મળશે. ત્રણ સ્ક્વોડ્રન્સતો ભારતને મળી ચૂકી છે. હવે બીજી પાંચ મળશે.
આ ઉપરાંત દુનિયાની શ્રેષ્ઠ ટેન્કો પૈકીની એક એવી ટી-૯૦ ટેન્કો ભારત રશિયા પાસેથી ખરીદવાનું છે. જે અંગે પણ વિધિવત મંત્રણા યોજાશે.
આ શિખર પરિષદમાં વડાપ્રધાન મોદી સાથે સંરક્ષણ મંત્રી રાજનાથ સિંહ અન્ય પ્રતિનિધિઓ સાથે ઉપસ્થિત રહેશે. જ્યારે રશિયા તરફથી પ્રમુખ પુતિનની સાથે તેમના સંરક્ષણ મંત્રી પણ જોડાયા હતા. મંત્રણા દરમિયાન એસ.યુ. ૫૭ પ્રકારનાં ફીફથ જનરેશન ફાઇટર્સની ખરીદી અંગે ચર્ચા થશે. આ ફાયટર પ્લેન્સ ફ્રાંસના રાફેલ કે અમેરિકાના એફ/એ-૧૮ કે એફ-૨૧ કે યુરોપના ટાયફૂન વિમાનોની બરોબરી કરી શકે તેમ છે.
