વડોદરા, તા.11 વિદેશમાં વિઝા માટે બેંક બેલેન્સ બતાવવા કન્સલ્ટન્ટ પાસે રૃા.૨૫ લાખ બેંકના ખાતામાં મેળવ્યા બાદ પૈસા પરત આપવાનો ઇન્કાર કરતા મામલો પોલીસ સ્ટેશનમાં પહોંચ્યો છે. પોલીસે બે મહિલા સહિત પાંચ સામે ગુનો દાખલ કર્યો છે.
વાઘોડિયારોડ વિસ્તારમાં પ્રથમ ડુપ્લેક્સમાં રહેતા રીકેન કનૈયાલાલ ખત્રીએ બાપોદ પોલીસ સ્ટેશનમાં નોંધાવેલી ફરિયાદમાં જણાવ્યું છે કે હું રીકેન ખત્રી એન્ડ કંપની નામે ફાઇનાન્સ કન્સલ્ટન્ટ તરીકે કામ કરું છું. નવેમ્બર-૨૦૨૪માં કારેલીબાગમાં શ્રીપાદનગરમાં રહેતા મારા મિત્ર તેજસ શાહે રેફરન્સ આપ્યો હતો અને જણાવેલ કે મારો મિત્ર સાગર પટેલ વિદેશમાં વિઝા બાબતના એજન્ટ તરીકે કામ કરે છે તેમજ તેના ક્લાયન્ટ સાગરની પત્ની હેમાંગીની ફીનલેન્ડ સ્ટુડન્ટ વિઝા પર છે અને સાગર પોતે ડિપેન્ડન્ટ વિઝા પર ત્યાં છે.
સાગરના વિઝા પૂરા થવાથી વિઝાની મુદત રિન્યૂ કરવા બેન્ક બેલેન્સ બતાવવાની જરૃરિયાત હોવાથી સાગરના પિતા અશોક પટેલના વડોદરાના બેન્કના એકાઉન્ટમાં રૃા.૧૫ લાખ બેલેન્સ બતાવવાની એક દિવસ માટે જરૃર છે જેથી તે રકમ મોકલી ફી વસૂલ કરવાની મિત્રએ વાત કરતા મેં હા કહ્યું હતું અને રૃા.૧૫ લાખ ટ્રાન્સફર કર્યા હતાં. બીજા દિવસે વિઝાનું કામ પૂરું થતા પૈસા રિવર્સ કર્યા હતા અને લીગલ ફી પણ ચૂકવી હતી.
થોડા દિવસો બાદ સાગરનો ફોન આવ્યો હતો અને તેના તે જ ક્લાયન્ટ સાગરને ફરી રૃા.૨૫ લાખ પાંચ દિવસ માટે બેલેન્સ બતાવવાની જરૃર છે અને આ રકમ તેની પત્ની હેમાંગીનીના ખાતામાં બતાવવાની છે તેમ જણાવ્યું હતું. અગાઉ સમયસર પૈસા ચૂકવ્યા હોવાથી વિશ્વાસ બેઠો હતો અને રૃા.૨૫ લાખ મેં ટ્રાન્સફર કર્યા હતાં. જો કે એક મહિના સુધી પૈસા પરત આપ્યા ન હતા જેથી ટ્રાવેલ એજન્ટ સાગરને વાત કરતા તેણે ચોખ્ખી ના પાડી હતી અને પૈસા મેં લીધા નથી તમે સાગરના પિતા અશોકભાઇને મળો તેમ કહ્યું હતું. ત્યારબાદ હું પૈસાની વારંવાર માંગણી કરવા છતાં પાંચ માસ સુધી પરત આપ્યા ન હતા અને વિઝાનું કામ નહી થાય ત્યાં સુધી પૈસા પરત નહી મળે તેમ કહ્યું હતું. આ સમય દરમિયાન સાગર અને તેની પત્ની હેમાંગીની પણ ફીનલેન્ડથી વડોદરા પરત આવી ગયા છે. ઉપરોક્ત વિગતોની ફરિયાદ મુજબ પોલીસે વધુ તપાસ હાથ ધરી છે.
