અમદાવાદ, શનિવાર
લાંભા વિસ્તારમાં મોર્નિંગ વોક કરવા ગયેલા યુવકને ચોર સમજીને પકડી લીધા બાદ દોરડાથી બાંધીને પાઇપથી માર્યો હતો. જો કે સમયસર પોલીસ આવી પહોંચતા યુવક બચી ગયો હતો. યુવકને હાથ પગે અને બરડામાં ગંભીર ઇજાઓ થઇ હતી. આ બનાવ અંગે નારોલ પોલીસે બે લોકો સામે ગુનો નોંધી વધુ તપાસ હાથ ધરી છે.
ટોળાએ માર મારતા યુવકને હાથ-પગ બરડામાં ગંભીર ઇજા ઃ સમયસર પોલીસ આવી પહોંચતા યુવક બચ્યો
લાંભા વિસ્તારમાં ઇન્દીરાનગર ખાતે રહેતા અને છૂટક મજૂરી કરતા અજયભાઇ (ઉ.વ.૨૨)એ નારોલ પોલીસ સ્ટેશનમાં લાંભા ગામ નજીક રહેતા રાહુલભાઇ અને મહેશભાઇ સામે ફરિયાદ નોંધાવી છે કે યુવકને તા. ૨૩ના રોજ વહેલી સવારે ઉંઘ આવતી ન હતી જેથી તે ઘરની બહાર ચાલવા નીકળ્યો હતો ચાલતો ચાલતો બાજુમાં રિધ્ધી સિધ્ધીનગર સોસાયટી પાસેથી પસાર થતો હતો
ત્યારે કેટલાક લોકોએ ચોર આયો ચોર આયો કહીને બુમા બુમ કરતા યુવક ત્યાં જ ઉભો રહેતા લોકોએ પકડી લીધો હતો અને ચોર સમજી દોરડાથી હાથ- પગ બાંધી દીધા હતા. ત્યારબાદ કેટલાક લોકોએ હાથ-પગે અને બરડામાં તેને પ્લાસ્ટીકના પાઇપના ફકટા માર્યા હતા. જો કે કોઇએ પોલીસ કંટ્રોલ રૃમમાં ફોન કરતા નારોલ પોલીસ ત્યાં પહોંચી હતી લોકોનું ટોળું જોઇને યુવક ગભરાઇ ગયો હોવાથી યુવકને બચાવી પોલીસ સ્ટેશને લાવ્યા હતા અને આરોપીઓ સામે ગુનો નોંધીને યુવકને હોસ્પિટલમાં લઇ જઇને સારવાર કરાવી હતી.
