વડોદરાઃ નવી શિક્ષણ નીતિ લાગુ તો કરી દેવાઈ છે પરંતુ એમ.એસ.યુનિવર્સિટીનો શૈક્ષણિક વિકાસ સ્થગિત થઈ ગયો હોય તેમ લાગે છે.છેલ્લા ત્રણ વર્ષમાં યુનિવર્સિટીમાં માત્ર એક જ નવો કોર્સ શરુ કરવામાં આવ્યો છે.
સૂત્રોનું કહેવું છે કે, ૨૦૨૨માં આર્ટસ ફેકલ્ટીમાં હિન્દુ સ્ટડીઝ અને ડિફેન્સ સ્ટડીઝ એમ બે નવા ડિગ્રી કોર્સ શરુ કરવામાં આવ્યા હતા.એ પછી વર્તમાન શૈક્ષણિક વર્ષમાં ટેકનોલોજી ફેકલ્ટીમાં એરોનોટિકલ એન્જિનિયરિંગનો ડિગ્રી કોર્સ લોન્ચ કરાયો છે.
કોરોના પહેલા દર વર્ષે બે થી ત્રણ ડિપ્લોમા કે ડિગ્રી કોર્સ શરુ થતા હતા.જેના કારણે અત્યારે ૬૦ કરતા વધારે સેલ્ફ ફાઈનાન્સ કોર્સ ચાલે છે.જોક છેલ્લા ત્રણ વર્ષમાં એક પણ ફેકલ્ટીએ એકાદ-બે સર્ટિફિકેટ કોર્સના અપવાદને બાદ કરતા ડિગ્રી કે ડિપ્લોમા કોર્સ શરુ કરવામાં રસ દાખવ્યો નથી.એક વર્ષ પહેલા યુનિવર્સિટીમાં ઈન્ડિયન નોલેજ સેન્ટરના ઉપક્રમે સંખ્યાબંધ સર્ટિફિકેટ કોર્સ શરુ કરવાની જાહેરાત કરાઈ હતી.જોકે સેન્ટર શરુ થાય તે પહેલા જ તેને તાળા વાગી ગયા છે.સર્ટિફિકેટ કોર્સનું બાળમરણ થઈ ગયું છે.
યુનિવર્સિટીના હાયર પેમેન્ટ કોર્સિસના ડાયરેકટર સુધાકર પદમજાનું કહેવું છે કે, નવા કોર્સ શરુ કરવા માટે ફેકલ્ટીઓ પાસે પ્રસ્તાવો મંગાવવામાં આવ્યા છે.
પહેલેથી ચાલતા કોર્સ પણ ડચકા ખાઈ રહ્યા છે
યુનિવર્સિટીના એક પ્રોફેસરે નામ નહીં આપવાની શરતે કહ્યું હતું કે, નવા કોર્સ શરુ થવાનું તો બાજુ પર રહ્યું પણ જે કોર્સ ચાલે છે તે પણ ડચકા ખાઈ રહ્યા છે.જેમ કે હિન્દુ સ્ટડીઝ અને ડિફેન્સ સ્ટડીઝના કોર્સમાં હવે આંગળીના વેઢે ગણાય તેટલા વિદ્યાર્થીઓ છે.યુનિવર્સિટીના બીબીએ, બીસીએ, સેલ એન્ડ મોલેક્યુલર બાયોલોજી જેવા આંગળીના વેઢે ગણાય તેવા કોર્સ છે જેની તમામ બેઠકો ભરાય છે.કેટલાક કોર્સમાં તો વિદ્યાર્થીઓની ફીમાંથી ભણાવવા માટે રાખેલા હંગામી અધ્યાપકોનો પગાર પણ નીકળે નહીં તેવી સ્થિતિ છે.
