Gati Shakti Vishwavidyalaya : ગતિ શક્તિ વિશ્વવિદ્યાલય (GSV) અને ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO) વચ્ચે મહત્વપૂર્ણ સમજૂતી કરાર (MoU) પર હસ્તાક્ષર કરવામાં આવ્યા છે.
આ કરાર DRDOના ચેરમેન અને ડિફેન્સ R&D સચિવ ડો. સમીર વી. કામતની ઉપસ્થિતિમાં કરવામાં આવ્યો છે. તેમણે કહ્યું હતું કે, આ સહકારથી સ્વદેશી રક્ષણ પ્રણાલીઓના ડિપ્લોયમેન્ટ માટે આવશ્યક ટેક્નોલોજીકલ સોલ્યુશન્સ વિકસાવવામાં મહત્ત્વપૂર્ણ ગતિ મળશે. આ MoU લોજિસ્ટિક્સ મેનેજમેન્ટ, ટેક્ટિકલથી લઈ સ્ટ્રેટેજિક સ્તર સુધીની ઓપરેશનલ લોજિસ્ટિક્સનું વિશ્લેષણ, ચિપ ડિઝાઇન, હાર્ડવેર સિક્યોરિટી અને હોમોમોર્ફિક/બ્લોકચેઇન આધારિત એનક્રિપ્શન જેવા ક્ષેત્રોમાં સંયુક્ત અભ્યાસ અને સંશોધનને પ્રોત્સાહિત કરશે. સહકારનો હેતુ ઓપરેશનલ અને મિલિટરી સાયન્સ, લોજિસ્ટિક્સ મેનેજમેન્ટ તથા ટેક્નિકલ રિસર્ચ ક્ષેત્રે સંશોધકો અને વૈજ્ઞાનિકોની ક્ષમતાઓ વિકસાવવાનો છે. આ MoU પર GSVના કુલપતિ પ્રો. મનોજ ચૌધરી અને DRDOના ડો. લાલચંદ મંગલ (DS & DG (TM)) દ્વારા હસ્તાક્ષર કરવામાં આવ્યા છે.
