રોહીસાના યુવાન સાથે લગ્નનું નાટક કરી ૨.૬૦ લાખની ઠગાઈ કરેલી
પતિને ભાઈ બનાવી ઓળખાણ કરાવી હતી, યુવતી સામે ધરપકડ વોરંટ ઈસ્યુ
રાજુલા – રોહિસા ગામના યુવાન સાથે લગ્નનું નાટક કરી ૨.૬૦ લાખની ઠગાઈ આચરવાના કેસમાં લૂટેરી દુલ્હનના બે સાગરિતને ત્રણ વર્ષ સખત કેદની સજાનો હુકમ કરાયો છે.
રોહિસા ગામે રહેતા દેવજીભાઈ ગોવિંદદાસ ચૌહાણ નામના યુવાનના લગ્ન કરાવવા માટે તેમના પિતા ગોવિંદદાસ માધવદાસ ચૌહાણે દલાલ ઈશ્વરદાસ પરશોત્તમદાસ દેવમુરારી નામના શખ્સ સાથે સંપર્ક કરી તેને પ્રથમ ટિકિટ ભાડાના ૧૦ હજાર રૃપિયા આંગડિયા મારફત આપ્યા હતા. ત્યારબાદ ઈશ્વરદાસ, યુવતી પ્રિયંકા હરબાજી ઢોબળે અને તેનો પતિ ધર્મેન્દ્ર બાબુભાઈ પ્રજાપિત સહિતનાઓ યુવક અને તેના પરિવારને મળ્યા હતા. ત્યારે ધર્મેન્દ્રને પ્રિયંકાનો ભાઈ હોવાની ઓળખ કરાવી રૃા.૨,૬૦,૦૦૦માં લગ્ન કરી રોહિસા ગામે ફૂલહાર કરી સાંજે અમરેલીમાં લગ્ન નોંધણી કરાવી હતી. બીજા દિવસે લૂટેરી દુલ્હન પ્રિયંકાએ કપડાંની ખરીદીનું બહાનું કરતા યુવકની બહેન લક્ષ્મીબેન તેણી સાથે ટીંબી ગામે કપડાં લેવા માટે ગયા હતા. ત્યાં બપોરના સમયે પ્રિયંકા ઝાડીમાં શૌચક્રિયા કરવા જવાનું કહીં રફુચક્કર થઈ ગઈ હતી. આ બાબતે ત્રણેય સામે વિશ્વાસઘાત, છેતરપિંડી, ૨.૬૦ લાખની રકમ ઓળવી જઈ ખોટી ઓળખ આપી ઠગાઈ કર્યા અંગેનો ગુનો દાખલ થયો હતો. આ કેસ જાફરાબાદના જ્યુડી. મેેજિ.ની કોર્ટમાં ચાલી જતાં સરકારી વકીલ દિવ્યેશ બી. ગાંધીની દલીલો, પુરાવાઓનું મુલ્યાંકન કરી ન્યાયમૂર્તિ પી.એમ. કામદારે આરોપી ઈશ્વરદાસ દેવમુરારી અને ધર્મેન્દ્ર પ્રજાપતિને ત્રણ વર્ષ સખત કેદની સજા, ૧૦ હજારનો દંડ ફટકાર્યો છે. તેમજ લૂંટેરી દુલ્હન પ્રિયંકા હરબાજી ફરાર હોય, તેની સામે ધરપકડ વોરંટ ઈસ્યુ કરાયંજ છે.
