Vadodara News : સંસ્કારી નગરી વડોદરામાં ફરી એકવાર દીકરીની સુરક્ષા સામે સવાલ ઉઠાવતી ઘટના સામે આવી છે. શહેરના આજવા રોડ પર મહાવીર હોલ પાસે આવેલા એક કોમ્પલેક્ષમાં ભાડે રહેતા યુવકે ખાનગી કોલેજની વિદ્યાર્થીનીને પોતાની હવસનો શિકાર બનાવી હોવાની ગંભીર ફરિયાદ નોંધાઈ છે. પોલીસે આ મામલે ત્વરિત કાર્યવાહી કરી આરોપીની ધરપકડ કરી લીધી છે.
બહાનું બનાવી ઘરે બોલાવી, પછી ખેલ્યો હવસનો ખેલ
મળતી વિગતો અનુસાર, આરોપી આકાશ આજવા રોડ મહાવીર હોલ પાસેના એક કોમ્પલેક્ષમાં ભાડેથી રહે છે. તેણે પરિચિત એવી ખાનગી કોલેજની વિદ્યાર્થીનીને કપડા ધોવાના બહાને પોતાના ઘરે બોલાવી હતી. યુવતી જ્યારે તેના ઘરે પહોંચી ત્યારે આરોપીએ એકાએક દરવાજો અંદરથી બંધ કરી દીધો હતો. યુવતી કંઈ સમજે તે પહેલા જ આરોપીએ તેને ડરાવી-ધમકાવી તેની સાથે બળજબરી કરી હતી. નરાધમની ચુંગાલમાંથી યુવતી માંડ માંડ પોતાનો જીવ બચાવીને ભાગી છૂટી હતી અને સમગ્ર આપવીતી પોતાના પરિવારને જણાવી હતી.
આ પણ વાંચો : ગાંધીનગરમાં હચમચાવતી ઘટના, મનપાની બે કર્મચારીએ કેનાલમાં ઝંપલાવી આત્મહત્યા કરી
FSL ની ટીમ સાથે પોલીસની તપાસ
યુવતીએ હિંમત દાખવીને બાપોદ પોલીસ મથકમાં ફરિયાદ નોંધાવતા પોલીસ એક્શનમાં આવી હતી. મોડી રાત્રે બાપોદ પોલીસની ટીમ એફએસએલ (FSL) ના નિષ્ણાતો સાથે આરોપી આકાશના ઘરે પહોંચી હતી. જે સ્થળે દુષ્કર્મ આચરવામાં આવ્યું હતું, ત્યાંથી ફોરેન્સિક ટીમે વૈજ્ઞાનિક પુરાવા અને સેમ્પલ એકત્રિત કર્યા છે. જેથી કોર્ટમાં આરોપી વિરુદ્ધ મજબૂત કેસ બનાવી શકાય.
લોકોમાં રોષ
આ ઘટનાને પગલે સ્થાનિક રહીશોમાં ભારે રોષ જોવા મળી રહ્યો છે. રહેણાંક કોમ્પલેક્ષમાં ભાડે રહેતા શખ્સ દ્વારા આ પ્રકારનું કૃત્ય આચરવામાં આવતા લોકો સુરક્ષા બાબતે ચિંતિત બન્યા છે. હાલમાં પોલીસે આરોપી આકાશને જેલના સળિયા પાછળ ધકેલી દીધો છે અને વધુ તપાસ હાથ ધરી છે.
આ પણ વાંચો :સુરતના ડીંડોલીમાં સ્વામિનારાયણ મંદિરના બાથરૂમમાંથી બે વિદ્યાર્થિનીના મૃતદેહ મળતાં ચકચાર
