– પીજીવીસીએલની 17મીએ મેગા ડિસકનેક્શન ડ્રાઈવ
– વર્તૂળ કચેરી હેઠળના 32 સબ ડિવિઝનમાં 320 ટીમને ડયૂટી ફાળવવામાં આવી
ભાવનગર : ફેબુ્રઆરી માસમાં બે વખત મેગા ડિસકનેક્શન ડ્રાઈવનું આયોજન કરી કરોડોના બાકી વીજબીલની રિકવરી કર્યાં બાદ પીજીવીસીએલ ભાવનગર વર્તૂળ કચેરી દ્વારા આગામી ૧૭મી માર્ચના રોજ વધુ એક વખત મેગા ડિસકનેક્શન ડ્રાઈવ યોજવામાં આવશે. સમયસર વીજબીલ નહી ભરનારા ૬ હજારથી વધારે ગ્રાહકોના વીજ કનેક્શન કટ કરવાની કામગીરી માટે ૩૨૦ ટીમોને ડયૂટી ફાળવવામાં આવી છે.
પીજીવીસીએલ ભાવનગર વર્તૂળ કચેરી દ્વારા ગત ફેબુ્રઆરી માસમાં બે વખત મેગ ડિસકનેક્શન ડ્રાઈવ યોજી કરોડો રૂપિયાના બાકી વીજબીલની વસૂલાત પૂર્ણ કરવામાં આવી હતી. જે બાદ ભાવનગર વર્તૂળ કચેરી દ્વારા વધુ એક વખત મેગા ડિસકનેક્શન ડ્રાઈવનું આયોજન કરવામાં આવ્યું છે. આગામી તા.૧૭મી માર્ચના રોજ ભાવનગર વર્તૂળ કચેરીની પાંચ વિભાગિય કચેરી હેઠળ આવતી કુલ ૩૨ પેટા વિભાગિય કચેરી હેઠળના વિસ્તારોમાં ડ્રાઈવ યોજવામાં આવશે. જેમાં પ્રત્યેક ડિવિઝન દિઠ ૧૦ ટીમ લેખે કુલ ૩૨૦ ટીમોને ડયૂટી ફાળવવામાં આવી છે. જે સ્થળ પર જઈ લાઈટ બીલ નહી ભરનારા ગ્રાહકનું વીજ કનેક્શન કાપી નાખશે. જે કનેક્શન પુનઃસ્થાપિત કરવા માટે ગ્રાહકે પેટા વિભાગિય કચેરીએ વીજ બીલની રકમ તથા રિકનેક્શન ચાર્જ ભરવાનો થશે. આગામી તા.૧૭મી માર્ચને મંગળવારના રોજ વીજબીલ નહી ભરનારા ૬૪૦૦ ગ્રાહકોના વીજ કનેક્શન કટ કરવાની કામગીરી થશે.
જિલ્લાના 10 ગામોમાં એક પણ બાકી વીજબીલ નહી
ભાવનગર જિલ્લાના વાલેસપુર, સીતાપુર, સેંદરડા, ગોલરામા, જુના પાદર, જાળિયા ખારા, માળિયા, મોટી માંડવાળી અને પઢીયારકા ગામમો બાકી વીજબીલનું ૧૦૦ ટકા ચુકવણું થતાં આ ગામોમાં વીજ બીલ ભરવાનું બાકી હોય તેવો એક પણ ગ્રાહક નથી.
