શી નો હસતો ફોટો ચીની મીડિયામાંથી દૂર કરાયો
શી-જિનપિંગ હંમેશા શાંત કે ગંભીર મુખમુદ્રામાં જ ફોટામાં દેખાય છે બુસાન (દ.કોરિયા)માં ટ્રમ્પ સાથેની મંત્રણામાં હસતા દેખાયા છે
નવી દિલ્હી: ચીનના સર્વેસર્વા પ્રમુખ શી જિનપિંગ સામાન્યતઃ હસતા દેખાતા કોઈપણ ફોટામાં જોવા મળતા નથી. તેનું કારણ તે છે કે ચીની સરકાર અને ચીનનાં સરકારી મીડિયાઓ ગંભીરતા દર્શાવા જ પ્રયત્નો કરે છે.
તાજેતરમાં બુસાન (દ.કોરિયા)માં યોજાયેલી ‘એશિયા પેસિફિક ઈકોનોમિક કો-ઓપરેશન’ (એ.પી.ઈ.સી.)ની બેઠકમાં સોયાબિન, ફેન્ટાનીલ, રેર અર્થસ્ અને કોમ્પ્યુટર ચીપ્સ વિષે ચર્ચા ચાલતી હતી, ત્યારે શી-જિનપિંગની સામે ડોનાલ્ડ ટ્રમ્પ બેઠા હતા. ટ્રમ્પના હાથમાં કોઈ પત્ર હતો, શીની બાજુમાં ચીનના વિદેશ મંત્રી વાંગ-ચી બેઠા હતા ત્યારે શી-જિનપિંગની આંખો બંધ દેખાતી હતી, પરંતુ મુખ ઉપર સ્મિત અને પછી હળવું હાસ્ય પ્રસરતું જોવા મળે છે.
આ તસ્વીર વાયરલ થઈ રહી છે.
આ મંત્રણા સમયે દ.કોરિયાના પ્રમુખ લી.જે.મિયુંગ પણ ઉપસ્થિત હતા. તેઓએ મંત્રણા પૂર્વે શીને કેટલીક સોગાતો પણ આપી હતી. જેમાં એક ‘પેસ-બોર્ડ’ પણ સમાવિષ્ટ હતું. મંત્રણા દરમિયાન લી એ પૂછ્યું કે, ‘સંચાર વ્યવસ્થાની સલામતી કેવી છે ?’ ત્યારે ઘણા હસી પડયા (કારણ કે તેમાં સલામતી જેવું હવે લગભગ રહ્યું જ નથી.) આ સમયે શી પણ હસી પડયા. મંત્રણા ખંડના જાડા કાચનાં બારણાની બહાર રહેલા કોઈ પત્રકારે તે ફોટો ખેંચી લીધો. કદાચ હજી સુધીમાં ચીનમાં હસતા ‘શી’નો પ્રસિદ્ધ થયેલા આ એક માત્ર ફોટો બની રહેશે.
અમેરિકા અને અન્ય દેશોમાં તો આ ફોટો વાયરલ થઈ રહ્યા છે, પરંતુ ચીનમાં તે અટકાવી દેવામાં આવ્યો છે. ચીનના મીડીયામાં તો હંમેશા શીન શાંત અને ગંભીર મુખ મુદ્રામાં જ જોવા મળે છે.
ચીનમાં અભિવ્યક્તિની મુક્તિ નથી, તેટલું જ નહીં પરંતુ માહિતીનો પ્રવાહ પણ અંકુશિત રખાય છે. તેથી શીની ‘હસતી તસવીર’ પણ ચીનમાં પ્રસિદ્ધ થઈ નથી. સોશ્યલ મીડિયા અને પશ્ચિમની ન્યૂઝ-વેબ-સાઇટ્સ પણ ચીનમાં પ્રતિબંધિત છે. ચીનમાં સેન્સરશીપ ઘણી કઠોર છે. સરકારે આપેલા નિવેદનો ‘શી’ અંગેના પણ ચીનનું સેન્સર બોર્ડ રદ્દ જાહેર કરતાં તે પ્રસિદ્ધ થઈ શકતા નથી. વિબો, ડૌચીન અને શીયોહોંગશુ જેવી વેબસાઇટસ્ ઉપર સરકાર વિરોધી કે સામ્યવાદી પાર્ટી વિરોધી કશું પ્રસિદ્ધ થઈ શકતું નથી. માત્ર શી અને લી વચ્ચે પારસ્પરિક ભેટ-સોંગાદો વિષે મેન્ડેરિન (ચાઈનીઝ) ભાષામાં સરકારી ચેનલ અને વેબસાઇટ વીબોએ પ્રસિદ્ધ કર્યા હતા.
