Stock Market Today: શેરબજારમાં સળંગ બીજા સપ્તાહની શરૂઆત સકારાત્મક રહી છે. સેન્સેક્સ આજે 550.76 પોઈન્ટના ઉછાળે ખૂલ્યા બાદ 766.6 પોઈન્ટ સુધી ઉછળ્યો હતો. જે 10.39 વાગ્યે 757.97 પોઈન્ટના ઉછાળે 77663.48 પર ટ્રેડ થઈ રહ્યો હતો. એકંદરે સાર્વત્રિક લેવાલીના માહોલ વચ્ચે રોકાણકારોની મૂડીમાં આજે 4.21 લાખ કરોડનો વધારો થયો છે.
નિફ્ટી50માં 23500નું લેવલ ક્રોસ
નિફ્ટી50 પણ આકર્ષક સુધારા સાથે આગેકૂચ કરી રહ્યો છે. આજે નિફ્ટી 23500ના મજબૂત તેજીના સપોર્ટ લેવલે ખૂલ્યા બાદ 23583.25ની સપાટીએ પહોંચ્યો હતો. જે 10.41 વાગ્યે 223.80 પોઈન્ટના ઉછાળે 23574.55 પર ટ્રેડ થઈ રહ્યો હતો. બેન્કિંગ અને ફાઈનાન્સ શેરોમાં નીચા મથાળે ખરીદી વધતાં બેન્ક નિફ્ટી 996 પોઈન્ટના ઉછાળે કારોબાર થઈ રહ્યો હતો.
વૈશ્વિક સ્તરે અનિશ્ચિતતાઓના વાદળો દૂર થઈ રહ્યા છે. આર્થિક ગતિવિધિઓ મજબૂત બની છે. પરિણામે વૈશ્વિક શેરબજારોમાં પણ સુધારો જોવા મળ્યો છે. ભારતનું અર્થતંત્ર પણ વેગવાન બન્યું હોવાના અહેવાલો વચ્ચે છેલ્લા લગભગ એક માસથી ચાલી રહેલી મંદીનો અંત આવ્યો છે. માર્કેટે તેજીનો યુટર્ન લીધો છે.
304 શેરમાં અપર સર્કિટ
બીએસઈ ખાતે 10.54 વાગ્યા સુધીમાં કુલ ટ્રેડેડ 4019 શેર પૈકી 2796માં સુધારા અને 1032 શેર ઘટાડા તરફી ટ્રેડ થઈ રહ્યા હતા. આજે 304 શેરમાં અપર સર્કિટ જ્યારે 72 શેર વર્ષની ટોચે પહોંચ્યા હતા. બીજી તરફ 170 શેરમાં લોઅર સર્કિટ અને 77 શેર વર્ષના તળિયે પહોંચ્યા હતા.
વિદેશી રોકાણકારોનું કમબેક
ભારતીય શેરબજારમાં વિદેશી રોકાણકારોનું કમબેક થતાં જ સેન્સેક્સ અને નિફ્ટીમાં તેજીને ટેકો મળ્યો છે. શુક્રવારે એફઆઈઆઈએ રૂ. 7470.36 કરોડનું રોકાણ નોંધાવ્યુ હતું. એફઆઈઆઈના કમબેક સાથે માર્કેટ સેન્ટિમેન્ટ સુધર્યા છે. છેલ્લા બે ટ્રેડિંગ સેશન (ગુરૂવાર-શુક્રવાર)માં એફઆઈઆઈએ કુલ રૂ. 10709.5 કરોડની ખરીદી નોંધાવી છે.
ડોલર સામે રૂપિયો સુધર્યો
ફેડ રિઝર્વ દ્વારા આ વર્ષે બે વખત રેટ કટ કરવાની જાહેરાત સાથે ડોલર નબળો પડ્યો છે. જિઓ-પોલિટિકલ ક્રાઈસિસ પણ સુધર્યા છે. પરિણામે ડોલર સામે રૂપિયો 12 પૈસા સુધરી 85.86 પર ટ્રેડ થઈ રહ્યો છે.
બેન્કિંગ-રિયાલ્ટી શેરમાં ઉછાળો
બેન્કિંગ અને રિયાલ્ટી શેરમાં મોટાપાયે ખરીદી જોવા મળી છે. બીએસઈ બેન્કેક્સ 1412.79 પોઈન્ટ ઉછળ્યો છે. જ્યારે રિયાલ્ટી ઈન્ડેક્સ પણ 2.14 ટકા ઉછાળે ટ્રેડ થઈ રહ્યો છે.
