મુંબઈ : અમેરિકામાં ફેડરલ રિઝર્વ દ્વારા વ્યાજ દરમાં અપેક્ષા પ્રમાણે જ ૦.૨૫ ટકાનો ઘટાડો આવતા વૈશ્વિક બજારમાં કિંમતી ધાતુના ભાવ ઊંચા મથાળે સ્થિર થવા મથી રહ્યા હતા. ફેડરલ રિઝર્વના ચેરમેન જેરોમ પોવેલ દ્વારા વર્તમાન વર્ષમાં વધુ ઘટાડાના પણ સંકેત અપાયા હતા જેને લઈને કિંમતી ધાતુ હાલના સ્તરે કન્સોલિડેટ થવાનું ટ્રેડરો માની રહ્યા છે.
વિશ્વ બજાર પાછળ ઘરઆંગણે સોનાચાંદીમાં પાંખી વધઘટ રહી હતી. સ્થાનિકમાં હવે દશેરા-દિવાળીની ઘરાકી કેવી રહે છે તેના પર વેપારીઓની નજર રહેલી છે. અમેરિકામાં ક્રુડ તેલનો સ્ટોક ઘટીને આવતા ભાવ ફરી મક્કમ જોવા મળ્યા હતા.
ઘરઆંગણે મુંબઈ બજારમાં ૯૯.૯૦ દસ ગ્રામ સોનાના જીએસટી વગરના ભાવ રૂપિયા ૧,૧૦,૧૬૭ બોલાતા હતા. ૯૯.૫૦ના પ્રતિ દસ ગ્રામ ભાવ રૂપિયા ૧,૦૯,૭૨૬ કવોટ થતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગર રૂપિયા ૧,૨૭,૧૦૦ કવોટ થતા હતા. જીએસટી સાથે ભાવ ત્રણ ટકા ઊંચા મુકાતા હતા.
અમદાવાદ બજારમાં ૯૯.૯૦ સોનાના દસ ગ્રામના ભાવ રૂપિયા ૧૧૪૦૦૦ જ્યારે ૯૯.૫૦ના પ્રતિ દસ ગ્રામના ભાવ રૂપિયા ૧,૧૩,૭૦૦ મુકાતા હતા. ચાંદી .૯૯૯ એક કિલોના રૂપિયા ૧,૨૯,૦૦૦ કવોટ થતા હતા. વિશ્વ બજાર પાછળ સ્થાનિકમાં સોનાચાંદીમાં ટકેલુ વાતાવરણ જોવા મળતુ હતું. ઐતિહાસિક ઊંચા ભાવે દશેરા-દિવાળીમાં ઘરાકી કેવી રહે છે, તેના પર વેપારીઓની નજર રહેલી છે.
વિશ્વ બજારમાં સોનુ પ્રતિ ઔંસ ૩૬૫૪ ડોલર જ્યારે ચાંદી ઔંસ દીઠ ૪૧.૭૦ ડોલર મુકાતી હતી. પ્લેટિનમ વધી પ્રતિ ઔંસ ૧૩૮૬ ડોલર જ્યારે પેલેડિયમ ૧૧૫૬ ડોલર મુકાતું હતું.
ફેડરલ રિઝર્વ દ્વારા વ્યાજ દરમાં અપેક્ષા પ્રમાણે જ પા ટકાનો ઘટાડો આવ્યા બાદ કિંમતી ધાતુ ઊંચા મથાળે સ્થિર થવા મથી રહી છે. વર્તમાન વર્ષમાંપ્લેટિનમમાં સૌથી વધુ વળતર છૂટી રહ્યું છે. વિશ્વ બજારમાં સોનામાં ૩૮ ટકા અને ચાંદીમાં ૪૩ ટકા વળતર છૂટયું છે જ્યારે પ્લેટિનમમાં ૫૫ ટકાથી વધુ વળતર છૂટી રહ્યું છે.
વૈશ્વિક સ્તરે પ્લેટિનમની માગ સામે પૂરવઠા ખેંચ તથા ઓટો ક્ષેત્રમાં તેના વધી રહેલા વપરાશથી ભાવમાં મજબૂતાઈ જોવા મળી છે.
દરમિયાન અમેરિકામાં ઈન્વેન્ટરી નોંધપાત્ર ઘટીને આવતા ક્રુડ તેલના ભાવ સુધારા તરફી રહ્યા હતા. ૧૨ સપ્ટેમ્બરના સપ્તાહમાં ક્રુડ ઓઈલનો સ્ટોક ૯૩ લાખ બેરલ્સ જેટલો ઘટી ગયાના અહેવાલ હતા. નાયમેકસ ડબ્લ્યુટીઆઈ પ્રતિ બેરલ ૬૪.૦૮ ડોલર જ્યારે આઈસીઈ બ્રેન્ટ ક્રુડ ઓઈલ મોડી સાંજે પ્રતિ બેરલ ૬૮.૦૯ડોલર મુકાતું હતું.
