Ahmedabad News: આગામી મ્યુનિસિપલ કોર્પોરેશન, તાલુકા પંચાયતો અને નગરપાલિકાઓની ચૂંટણીઓને લઈ અમદાવાદ જિલ્લા ચૂંટણી તંત્ર એક્શન મોડમાં છે. જોકે, આ વખતે ચૂંટણી પ્રક્રિયા પાર પાડવા માટે સ્ટાફની ભારે અછત વર્તાઈ રહી છે. તંત્રને 30,000 થી વધુ કર્મચારીઓની જરૂર હોવાથી હવે નિવૃત્ત શિક્ષકો અને બીએલઓને પણ મેદાનમાં ઉતારવામાં આવ્યા છે. પરંતુ, આ સ્ટાફની વહેંચણીમાં થયેલી કેટલીક ભૂલોને કારણે મોટો વિવાદ અને રોષ ફેલાયો છે.
આચાર્યને પટ્ટાવાળાની કામગીરી
સૌથી વધુ ચોંકાવનારી વિગત એ સામે આવી છે કે, જિલ્લાના અનેક સીનિયર એચટાટ મુખ્ય શિક્ષકો અને સ્કૂલ આચાર્યોને પટ્ટાવાળા તરીકેની કામગીરીના ઓર્ડર કરી દેવાતા રોષ જોવા મળી રહ્યો છે. વર્ષો સુધી શિક્ષણ આલમમાં આદરણીય પદ પર રહેલા આચાર્યોને આવા ઓર્ડર મળતા શિક્ષક આલમમાં ભારે નારાજગી અને રોષ ફેલાયો છે. આચાર્યોનું કહેવું છે કે આ તેમના પદ અને અનુભવનું અપમાન છે.
આ પણ વાંચો: પ્રત્યેક નાગરિકને ચૂંટણી પ્રક્રિયા અને મતદાનમાં ભાગ લેવાનો અધિકાર : SIR અંગે ગુજરાત હાઈકોર્ટનો ચુકાદો
BLO ની બેવડી મુસીબત
બીજી તરફ, છેલ્લા ઘણા સમયથી જે શિક્ષકો બીએલઓ તરીકે ફરજ બજાવી રહ્યા છે, તેમને હવે આસિસ્ટન્ટ પ્રિસાઇડિંગ ઓફિસર તરીકેની વધારાની જવાબદારી સોંપાઈ છે. BLO કર્મચારીઓની ફરિયાદ છે કે, ચૂંટણીના દિવસે BLO ની મુખ્ય કામગીરી વોટિંગ બૂથની બહાર મતદાર યાદી ચેક કરવાની હોય છે. જ્યારે આસિસ્ટન્ટ પ્રિસાઇડિંગ ઓફિસરની ફરજ બૂથની અંદર હોય છે.આવામાં એક જ કર્મચારી એકસાથે અંદર અને બહારની બે મહત્વની ભૂમિકાઓ કઈ રીતે ભજવશે? આ એક મોટો અણઉકેલ્યો પ્રશ્ન છે.
ચૂંટણી તંત્ર કેમ લાચાર?
અમદાવાદ કોર્પોરેશન અને જિલ્લાની ચૂંટણીઓ માટે કુલ મળીને 5,500 જેટલા વોટિંગ બૂથ નક્કી કરાયા છે. (4250 કોર્પોરેશન અને 1100 થી વધુ તાલુકા પંચાયત). દરેક બૂથ દીઠ પ્રિસાઇડિંગ ઓફિસર, આસિસ્ટન્ટ પ્રિસાઇડિંગ ઓફિસર અને પટ્ટાવાળા સહિત ઓછામાં ઓછા પાંચ કર્મચારીઓનો સ્ટાફ જરૂરી હોય છે. આ જંગી માનવબળની જરૂરિયાત પૂરી કરવા માટે ચૂંટણી તંત્ર પાસે નિવૃત્ત શિક્ષકો અને BLO ને બેવડી જવાબદારી સોંપવા સિવાય કોઈ વિકલ્પ બચ્યો નથી. હવે જોવાનું એ રહેશે કે, શિક્ષક સંઘોના વિરોધ બાદ ચૂંટણી તંત્ર આચાર્યો અને BLO ના ઓર્ડરમાં કોઈ સુધારો કરે છે કે કેમ.
