વડોદરા,છાણી ગામે રામા કાકા ડેરી પાસે પૂરઝડપે આવતી ક્રેનના ચાલકે ટુ વ્હિલર ચાલકને ટક્કર મારતા ગંભીર ઇજા થઇ હતી. ઇજાગ્રસ્તનું સારવાર દરમિયાન મોત થયું હતું.
છાણી ગામ પાકા કોટ નજીક ઓમ કોમ્પલેક્સમાં રહેતા ૭૧ વર્ષના વિનુભાઇ ભાઇલાલભાઇ બ્રહ્મભટ્ટ ગઇકાલે ટુ વ્હિલર લઇને શાકભાજી લેવા માટે ગયા હતા. સાંજે ચાર વાગ્યે તેઓ શાકભાજી લઇને ઘર તરફ પરત આવતા હતા. છાણી ગામ રામા કાકા ડેરી પાસે સામેથી રોંગ સાઇડ આવતી ક્રેનના ચાલકે તેઓને ટક્કર મારતા તેઓ રોડ પર ફંગોળાઇને પટકાયા હતા. તેઓને બંને હાથ, પગ અને અન્ય અંગો પર ગંભીર ઇજા થઇ હતી. અકસ્માતના પગલે લોકો દોડી આવ્યા હતા. ઇજાગ્રસ્ત વિનુભાઇને ક્રેનનો ચાલક તથા અન્ય લોકો સારવાર માટે નજીકની ખાનગી હોસ્પિટલમાં લઇ ગયા હતા. ટૂંકી સારવાર દરમિયાન તેઓનું મોત થયું હતું. બનાવ અંગે મૃતકના પુત્ર પીયૂષે ફરિયાદ નોંધાવતા પોલીસે ક્રેન ચાલક સામે ગુનો દાખલ કરી કાયદેસરની કાર્યવાહી હાથ ધરી છે. પોલીસનું કહેવું છે કે, ક્રેન ચાલક અને જીવ ગુમાવનાર બંને મિત્રો હતા.
