Jamnagar Accident : જામનગર-ખંભાળિયા ધોરી માર્ગ પર મોટી ખાવડી ગામના પાટીયા પાસે હિટ એન્ડ રનના બનાવવામાં બોલેરોમાં બેઠેલા એક યુવાનનું કરુણ મૃત્યુ નિપજ્યું છે, જયારે ખાનગી લક્ઝરી બસની ઠોકરમાં જીપમાં બેઠેલા અન્ય બે યુવાનો ઘાયલ થયા છે.
આ અકસ્માતના બનાવની વિગત એવી છે. કે જામનગર-ખંભાળિયા ધોરી માર્ગ પર મોટી ખાવડી ગામના પાટીયા પાસે આજે સવારે 8.30 વાગ્યાના અરસામાં એક બોલેરો પીકપ વેનને પાછળથી આવી રહેલી ખાનગી લક્ઝરી બસના ચાલકે ઠોકર મારી દેતાં અકસ્માત સર્જાયો હતો. જે અકસ્માતમાં બોલેરો જીપની અંદર બેઠેલા મોટી ખાવડી ગામના જીતેન્દ્ર નાથાભાઈ નામના 36 વર્ષના યુવાનનું ઘટનાસ્થળે જ કરૂણ મૃત્યુ નિપજ્યું હતું જ્યારે તેની સાથે બોલિરોમાં બેઠેલા દીપક ચંદુભાઈ તેમજ રાહુલભાઈભાઈ ચંદ્રવડીયા જે બંને યુવાનોને ઈજા થઈ હોવાથી સારવાર માટે જામનગરની સરકારી જી.જી. હોસ્પિટલમાં ખસેડવામાં આવ્યા છે.
આ બનાવની જાણ થતાં પોલીસ સ્ટેશનના પોલીસનો કાફલો બનાવના સ્થળે દોડી ગયો હતો અને મૃતદેહનો કબજો સંભાળી વધુ તપાસ હાથ ધરી છે. આ અકસ્માતના બનાવને લઈને મોટી ખાવડી પાસેથી વાહન વ્યવહાર અવરોધાયો થયો હતો, અને ટ્રાફિક જામની સમસ્યાઓ થઈ હતી. પડાણા પોલીસે બનાવના સ્થળે દોડી જઇ વાહન વ્યવહારને પૂર્વવત બનાવ્યો હતો, જયારે બસ ચાલક સામે ગુનો નોંધવા કાર્યવાહી હાથ ધરી છે.
