વડોદરાઃ વડોદરા જિલ્લાના પાદરા તાલુકામાં એપીએમસીના પૂર્વ ચેરમેન લેડી ડોક્ટરના ક્લિનિકમાંથી મધરાતે ધાબળો ઓઢીને બહાર નીકળ્યા હોવાના વિવાદ વચ્ચે હવે ભાજપના ધારાસભ્ય અને કોંગ્રેસના પૂર્વ ધારાસભ્ય વચ્ચે જુબાની જંગ જામતાં રાજકીય માહોલ ગરમાયો છે.
પાદરા તાલુકાના સરસવણી ગામે તા.૨૧મીએ પંચાયત ઘરના ખાતમુહૂર્ત પ્રસંગે ભાજપના ધારાસભ્ય ચૈતન્યસિંહ ઝાલાએ કોંગ્રેસ દ્વારા વિકાસના કામોમાં હવનમાં હાડકાં નાંખવામાં આવતા હોવાનું કહી તેમને રાક્ષસના વંશજો કહેતાં વિવાદ સર્જાયો હતો.
આ મદ્દે કોંગ્રેસના પાદરાના પૂર્વ ધારાસભ્ય જશપાલસિંગ સોશ્યલ મીડિયા પર લાઇવ થયા હતા અને તેમણે ૫૦૦ કરોડના વિકાસના કામોની યાદીનો હિસાબ જાહેર કરી તમે શું કર્યું છે તેનો જવાબ આપો તેવો સવાલ પૂછ્યો હતો.
ત્યારબાદ તરત જ ધારાસભ્યએ તેમને અભણ કહ્યા હતા અને મારે કોઇ વિવાદમાં પડવું નથી.લોકો જાણે જ છે તેમ કહ્યું હતું.તો સામે પૂર્વ ધારાસભ્યએ જવાબમાં ધારાસભ્યને ુજુઠ્ઠાસિંહ કહીને સંબોધ્યા હતા અને કહ્યું હતું કે,મારે તમારા કોઇ સર્ટિફિકેટની જરૃર નથી.
સરસવણી ગામે બનનારા પંચાયત ભવનનું ચાર દિવસમાં બે વાર ખાતમુહૂર્ત
પાદરાના ધારાસભ્યએ સરપંચને નહિ બોલાવતાં સરપંચે ફરીથી ખાતમુહૂર્ત કર્યું
સ્કૂલ કે શેરીના બાળકોના ઝઘડાની જેમ પાદરા તાલુકાનો રાજકીય માહોલ ગરમાયો છે.જેને કારણે પંચાયત ભવનનું બબ્બે વાર ખાતમૂહુર્ત થયું છે.
ભાજપના જિલ્લા પંચાયતના મહિલા સદસ્યની ગ્રાન્ટમાંથી પાદરાના સરસવણી ગામે આશરે ૨૩ લાખના ખર્ચે પંચાયત ભવન બનાવવાના કામને મંજૂરી મળતાં ભાજપના ધારાસભ્યના હસ્તે ચાર દિવસ પહેલાં તા.૨૧મીએ ખાતમુહૂર્ત કરાયું હતું.
આ કાર્યક્રમમાં કોંગ્રેસના પૂર્વ ધારાસભ્યના નિકટના મનાતા અલ્પેશ પટેલના સરપંચ બનેલા પત્નીને આમંત્રણ આપવામાં આવ્યું નહતું.જેને કારણે ગઇકાલે સરપંચ દ્વારા ફરીથી ખાતમુહૂર્ત કરવામાં આવ્યું હતું અને તેમાં ૪૦૦ જેટલા ગ્રામજનો હાજર રહ્યા હોવાનો દાવો કરાયો છે.
