Gadchiroli Encounter : મહારાષ્ટ્રના ગઢચિરોલી જિલ્લામાં પોલીસ અને માઓવાદીઓ વચ્ચે અથડામણ થઈ છે. આ દરમિયાન બંને તરફથી સામસામે આડેધડ ગોળીબાર થયો છે, જેમાં પોલીસે ચાર માઓવાદીને ઠાર કર્યા છે. ઘટના સ્થળ પરથી મોટી સંખ્યામાં દારુગોળો જપ્ત કરવામાં આવ્યો છે. અથડામણમાં માર્યા ગયેલા માઓવાદીમાં ત્રણ મહિલા અને એક પુરુષ હોવાનું સામે આવ્યું છે.
માઓવાદી છુપાયા હોવાની માહિતી મળ્યા બાદ પોલીસની કાર્યવાહી
મળતા અહેવાલો મુજબ, ગટ્ટા દલમ, કંપની નંબર-10 અને ગઢચિરોલી ડિવિઝનના માઓવાદીઓઓ ગઢચિરોલી-નારાયણપુર સીમા પાસેના કોપરશી જંગલ વિસ્તારમાં છુપાયેલા હોવાની પોલીસને ગુપ્ત સૂચના મળી હતી. ત્યારબાદ એડિશનલ પોલીસ અધિક્ષક એમ.રમેશની આગેવાની હેઠળ સી60ની 19 ટીમો અને સીઆરપીએફ ક્યૂએટીની બે ટીમો માઓવાદીઓને શોધવા માટે ત્યાં પહોંચી હતી.
આ પણ વાંચો : મેઘરાજાના રૌદ્ર રૂપના કારણે રૂ.1000 કરોડના રસ્તા ધોવાયા; 4 લેન હાઈવે ‘લુપ્ત’, ટોલ પ્લાઝાની ઉપરથી વહી રહી છે નદી
માઓવાદીઓનો આડેધડ ગોળીબાર
જંગલ વિસ્તારમાં ભારે વરસાદ પડી રહ્યો હતો, છતાં ટીમોએ સવારથી ત્યાં શોધખોળ અભિયાન ચાલુ રાખ્યું હતું. આ દરમિયાન માઓવાદીઓએ અચાનક પોલીસ દળ પર આડેધડ ગોળીબાર શરૂ કરી દીધો હતો. તો પોલીસે પણ માઓવાદીઓને વળતો જવાબ આપ્યો હતો. લગભગ આઠ કલાક સુધી અથડામણ ચાલી હતી, જેમાં ત્રણ મહિલા સહિત ચાર માઓવાદીઓને જ ઠાર કરી દેવાયા છે. પોલીસની ટીમોએ ઘટનાસ્થળ પરથી એક એસએલઆર રાઈફલ, બે ઈન્સાસ રાઈફલ અને 1.303 રાઈફલ જપ્ત કરી છે.
આ પણ વાંચો : ટ્રમ્પની અમેરિકા સહિત વિશ્વભરમાં ફજેતી, જાણો ટેરિફ મામલે શું કહે છે ‘વર્લ્ડ મીડિયા’
