Gujarat Rain: ગુજરાતમાં છેલ્લા ઘણાં દિવસોથી ધોધમાર વરસાદ વરસી રહ્યો છે. સૌરાષ્ટ્ર સિવાય રાજ્યભરમાં સિઝનનો 100 ટકાથી વધુ વરસાદ વરસી ચુક્યો છે. છેલ્લાં બે-ત્રણ દિવસમાં સતત વરસી રહેલા વરસાદના કારણે બનાસકાંઠા, પાટણ, અને કચ્છ સહિતના જિલ્લા પાણીમાં ગરકાવ થયા હતા. એવામાં બનાસકાંઠામાં 17 ઈંચથી વધુ વરસાદના કારણે જનજીવન ખોરવાયું હતું. જોકે, હવામાનની આગાહી મુજબ, હવે મેઘરાજા વિરામ લઈ શકે છે.
આ પણ વાંચોઃ અમિત ખૂંટ આત્મહત્યા કેસઃ હાઈકોર્ટે અનિરુદ્ધ સિંહ બાદ રાજદીપસિંહ જાડેજાની જામીન અરજી પણ ફગાવી
બનાસકાંઠામાં ભારે વરસાદ
બનાસકાંઠાના સુઈગામમ તાલુકામાં 17 ઈંચ વરસાદ ખાબક્યો હતો. આ સિવાય કચ્છમાં પણ જળબંબાકાર જેવી સ્થિતિ સર્જાઇ હતી. જોકે, પાણી ઓસર્યા બાદ જે નુકસાનીના દ્રશ્યો સામે આવ્યા તે ભયાનક હતા. બંને જિલ્લામાં ખેતીના પાકને ભારે નુકસાન થયું છે.
મોરબીનો મચ્છુ ડેમ 100 ટકા ભરાયો
મોરબીના મચ્છુ ડેમમાં પણ 100 ટકા પાણીની આવક નોંધાઇ છે. મોરબીના મચ્છુ- 2 ડેમ ઓવરફ્લો થઈ ગયો છે જેથી આજે મોરબી મહાપાલિકાના કમિશનર અને ડેપ્યુટી કમિશનર સંજય સોની ડેમ ખાતે પહોંચ્યા નવા નીરના વધામણા કર્યા હતા. આ સિવાય પાટણના સાંતલપુર ગામમાં ભારે વરસાદના કારણે અનેક વિસ્તારો બેટમાં ફેરવાયા હતા. અનેક ગામો પાણીમાં ગરકાવ થઈ જતા 6 જેટલા લોકો ફસાઇ ગયા હતા. જોકે, આ વિશે માહિતી મળતાની સાથે જ SDRFની ટીમ તાત્કાલિક ઘટનાસ્થળે પહોંચી રેસક્યુ કામગીરી હાથ ધરી હતી. હાલ તમામ લોકો સુરક્ષિત છે.
આ પણ વાંચોઃ ઉ. ગુજરાત યુનિ. નર્સિંગ પ્રવેશ કાંડમાં મોટા ખુલાસાઃ નિયમ વિરૂદ્ધ અનેક પ્રવેશ કરાયા અને માન્ય પણ થઈ ગયા
વરસાદ લેશે વિરામ?
નોંધનીય છે કે, આ વર્ષે ચોમાસા પહેલાં જ ગુજરાતમાં 105 ટકા વરસાદની આગાહી કરવામાં આવી હતી. જોકે, આ આગાહી તો સાચી પડી પરંતુ, હજુ ભાદરવાનો બાકીનો વરસાદ બાકી છે, જે ચિંતાનો વિષય બની શકે છે. જોકે, હવામાનની આગાહી મુજબ હવેના 6 દિવસ હળવાથી મધ્યમ વરસાદની આગાહી કરવામાં આવી છે. આ સિવાય રાજ્યભરમાં વરસાદનો જોર ઘટી શકે છે.
