નગર પ્રાથમિક શિક્ષણ સમિતિના ચોથા વર્ગના કર્મચારીઓને પાછલા બે મહિનાથી વેતન ન ચૂકવાતા કર્મચારીઓની આર્થિક પરિસ્થિતિ ડામાડોળ બની હતી.
કોર્પોરેશન હસ્તકની નગર પ્રાથમિક શિક્ષણ સમિતિના ચોથા વર્ગના ઉચ્ચક વેતનના કર્મચારીઓને પાછલા બે મહિનાનું વેતન હજુ સુધી ન ચૂકવાતા 35 જેટલી શાળાઓના કર્મચારીઓ મુશ્કેલીમાં મુકાયા હતા. ચોથા વર્ગમાં સમાવિષ્ટ સફાઈ સેવક, પટાવાળા, પગી સહિતના 400થી વધુ કર્મચારીઓને જુલાઈ અને ઓગસ્ટ મહિનાનું વેતન હજુ સુધી મળ્યું નથી. જેના કારણે તેઓની આર્થિક પરિસ્થિતિ કફોડી બની છે. સત્તાધીશોને રજૂઆત કરવા છતાં યોગ્ય પ્રતિસાદ ન સાંપડતા કર્મચારીઓમાં છૂપો રોષ જોવા મળ્યો હતો. આ અંગે શાસન અધિકારીનું કહેવું હતું કે, ટેકનિકલ ઇશ્યૂ તથા પેન્ડિંગ બિલના કારણે વિલંબ થયો છે, આવતીકાલે કર્મચારીઓને વેતન મળી જાય તેવો પ્રયાસ છે.
