ક્રેનથી ટ્રેલર કાઢી ખાડાંમાં મેટલ કામ કરી ઢાંક પીછોડો
જયવરૂણી કન્સ્ટ્રક્શનને ૧૪ કરોડના ખર્ચે સોંપાયેલું ભૂગર્ભ ગટર લાઈનનું કામ નબળું હોવાનો આક્ષેપ
કઠલાલ: કઠલાલ ઓવરબ્રિજ પાસે મુખ્ય માર્ગ ઉપર ભૂગર્ભ ગટર લાઈનના ખાડામાં ટ્રેલર ખાબકતા ફરાયું હતું. તાજેતરમાં જ ૧૪ કરોડના ખર્ચે કામગીરી શરૂ કરાતા આ ઘટના બનતા ભૂગર્ભ ગટરની નબળી કામગીરી થઈ રહી હોવાના આક્ષેપ સાથે સવાલો ઉઠી રહ્યા છે.
કપડવંજ- નડિયાદ રોડ ઉપર કઠલાલ ઓવરબ્રિજ પાસે હોસ્પિટલ સામે હજીરાથી દિલ્હી તરફ જતું લોડિંગ ટ્રેલર મુખ્ય માર્ગ ઉપર ભૂગર્ભ ગટરલાઈનમાં બે પૈડા ઉતરી ગયા હતા. આ ભૂગર્ભ ગટરની કામગીરી જય વરૂણી કન્સ્ટ્રક્શનને આશરે ૧૪ કરોડના ખર્ચે બે વર્ષના સમયગાળા દરમિયાન પૂર્ણ કરવા કામ સોંપ્યું છે. ત્યારે કઠલાલ નગરની અમૂક જગ્યાએ ગટરલાઈનની કામગીરી ખોદકામ કરી આડેધડ પૂર્ણ કરી દેવામાં આવા ભૂગર્ભ ગટરલાઈના ખાડામાં અકસ્માત થવાના શરૂ થયા હોવાનો આક્ષેપ નગરજનો કરી રહ્યા છે. સદનસીબે કઠલાલ ઓવરબ્રિજ પાસે બમ્પ હોવાના કારણે મોટી જાનહાનિ ટળી છે. ભૂગર્ભ ગટરલાઈનની કામગીરી શરૂ કઠલાલ ઓવરબ્રિજથી કરાઈ ત્યારથી જ નબળી કામગીરી થઈ રહી હોવાની બૂમ ઉઠી હતી. કઠલાલ નગરમાં જેસીબીથી ખોદકામ કરીને પાઈપ લાઈન નાંખવાની કામગીરી હાલ પૂરઝડપે ચાલી રહી છે. ત્યારે ભૂગર્ભ ગટરની કામગીરીની પોલ ખૂલી ન જાય માટે ક્રેનથી લોડિંગ ટ્રેલર કાઢી ખાડાંમાં મોટું ગાબડું ન પડે તે માટે મેટલ કામ કરીને ત્વરિત ઢાંક પીછોડો કરી દેવામાં આવ્યો હતો.
