બદનામ કરવા અને ફરિયાદ નોંધાવવાની ધમકી આપી હતી : મહિલાએ વીડિયો ઉતારી બહેનપણીને અને તેણે જૂનાગઢના શખ્સને આપ્યો હતો : બાદમાં બ્લેકમેઈલિંગ શરૂ કરાયું હતું
જૂનાગઢ, : જૂનાગઢના નિવૃત્ત આર.એફ.ઓ.ને હનીટ્રેપમાં ફસાવી 40 લાખની ખંડણી માંગવા મામલે પોલીસે રાજકોટની બે મહિલા અને જૂનાગઢના એક યુવકની ધરપકડ કરી છે. મહિલાએ વીડિયો ઉતારી તેની બહેનપણીને આપ્યો હતો. બાદમાં આ વીડિયો જૂનાગઢના યુવકને આપી બ્લેકમેલ શરૂ કર્યું હતું.
શહેરના ચોબારી રોડ પર રહેતા નિવૃત આરએફઓ પરષોતમભાઈ ત્રિકમભાઈ કનેરીયા (ઉ.વ. 67)ને સોશ્યલ મિડીયાના માધ્યમથી રાજકોટની ઉર્મીલા નામની મહિલાએ પરિચય કેળવી રાજકોટ મળવા બોલાવી ચોટીલા લઈ જઈ ત્યાં હોટલમાં અંગત પળ માણી તેનો વિડીયો ઉતારી લીધો હતો. બાદમાં પોતે ગર્ભવતી થઈ ગઈ છે એમ કહી એબોર્શન માટે પૈસા પડાવ્યા હતા. બાદમાં જીશાન બદવી નામના શખ્સે વિડીયો મોકલી 40 લાખ રૂપિયા ખંડણી માંગી હતી, નહીતર વિડીયો સગાસબંધીઓને મોકલી દેવા ધમકી આપી હતી. ‘છોકરીઓ સાથે મિત્રતા કરી શરીર સબંધ બાંધી ગર્ભવતી કરી અને રૂપિયા આપી છોકરા પડાવી આપો છો’ એમ કહી ખોટી ફરિયાદ કરવા પણ ધમકી આપી હતી.
આ મામલે નિવૃત આરએફઓએ ફરિયાદ કરતા એલસીબી તથા બી ડિવિઝન પોલીસે રાજકોટના રૈયા ચોકડી વિસ્તારમાં આવેલા મીરાનગરમાં રહેતી ઉર્મીલા ધનજી ખીમસુરીયા (ઉ.વ. 28), મૂળ જૂનાગઢની અને હાલ રાજકોટ રહેતી શગુફતા ઉર્ફે જોયા અબ્દુલહબીબ શેખ (ઉ.વ. 23) અને જૂનાગઢના જુલાઈવાડાનો જીશાન ફારૂક બદવીની ધરપકડ કરી હતી. બી ડિવિઝન પીઆઈ એ.બી. ગોહિલે જણાવ્યું હતું કે, આ ટોળકીએ રેન્ડમલી ફેસબુક પર નિવૃત આરએફઓને મેસેજ કરી ફસાવ્યા હતા. નિવૃત આરએફઓ આ ટોળકીનો તેઓ પ્રથમ શિકાર હોવાનું જણાવે છે. હાલ વધુ પૂછપરછ કરવામાં આવી રહી છે.
