વડોદરા, ગોત્રી સેવાસી રોડ પર આવેલી જ્વેલરી શોપમાં આજે આગ લાગતા ફાયર બ્રિગેડની ટીમે ઘટના સ્થળે દોડી જઇ આગ પર કાબૂ મેળવ્યો હતો. જ્યારે નવા બજારની દુકાન અને અમદાવાદી પોળમાં પણ આગના છમકલા થયા હતા.
ફાયર બ્રિગેડના સૂત્રોના જણાવ્યા અનુસાર, ગોત્રી સેવાસી રોડ પર રોમા એમ્પોરિયમમાં આવેલી યશોદા જ્વેલર્સની દુકાનમાં આગ લાગી હતી. જે અંગે ફાયર બ્રિગેડને જાણ કરવામાં આવતા સ્ટાફે ઘટના સ્થળે દોડી જઇ આગ પર કાબૂ મેળવ્યો હતો. શોર્ટ સર્કિટના કારણે આગ લાગી હોવાનું અનુમાન સેવાઇ રહ્યું છે.
જ્યારે ગઇકાલે સાંજે અમદાવાદી પોળના એક મકાનમાં પહેલા માળે પણ આગ લાગી હતી. જેમાં ઘરવખરી સામાન સળગી ગયો હતો. જ્યારે મકાનના ઉપરના માળે રહેતા એક સિનિયર સિટિઝનને આગના ધુમાડાના કારણે શ્વાસમાં તકલીફ થઇ હતી.
ન્યૂ અલકાપુરી ગોત્રી વિસ્તારમાં ગઇકાલે વેદાંત વિલા સોસાયટી પાછળ એક ખુલ્લા મેદાનમાં આગ લાગતા નજીકની સોસાયટીના રહીશોના જીવ પડીકે બંધાયા હતા. ફાયર બ્રિગેડની ટીમે દોડી જઇ આગ બુઝાવી હતી. ફટાકડાના કારણે આગ લાગી હોવાનું અનુમાન છે.
ખોડિયાર નગર ચાર રસ્તા નજીક ગાયત્રી ફર્નિચરની દુકાનમાં પણ આગનો બનાવ બન્યો હતો. અમિત નગર નજીક ટુ વ્હિલરમાં આગ લાગી હતી. જ્યારે દુમાડ રોડ મારૃતિ હાઇટ્સમાં દાદર પર પડેલા કચરા પર ફટાકડો પડતા આગ લાગી હતી. ફાયર બ્રિગેડની ટીમ પહોંચે તે પહેલા જ સ્થાનિક રહીશોએ આગ બુઝાવી દીધી હતી.
