વડોદરા,નવસારીના લોન કન્સલ્ટન્ટને ડોલર સસ્તામાં આપવાનું જણાવી સ્વામિ નારાયણ મંદિરના સંત તરીકેની ખોટી ઓળખ આપી ઠગ ત્રિપુટીને પોલીસે ખાનગી ડ્રેસમાં છટકું ગોઠવીને ઝડપી પાડી વધુ તપાસ હાથ ધરી છે.
નવસારી જિલ્લાના ચાપલધરા ગામે રહેતો પાર્થ જયસિંહ પરમાર હરસિદ્ધિ ફાઇનાન્સના નામે લોન કન્સલ્ટન્સીની ઓફિસ નવસારીના ધરમપુર ખાતે ચલાવે છે. નંદેસરી પોલીસ સ્ટેશનમાં તેણે ફરિયાદ નોંધાવી જણાવ્યું છે કે, ગત ફેબુ્રઆરી મહિનામાં ડોલર વેચવા માટે આરોપીએ મારો સંપર્ક કર્યો હતો. તેઓ સાથે વાત કરી ૨૦૦ ડોલરના ૧૦ હજાર રૃપિયા નક્કી કર્યા હતા. તેઓએ આણંદ નજીકના તારાપુર ચોકડી ખાતે બોલાવી ૧૦૦ ડોલરની બે અસલી નોટ આપી વિશ્વાસ કેળવ્યો હતો. થોડા દિવસ પછી ફરીથી મને બોલાવી ૧૦ હજાર ડોલર ૪.૫૦ લાખમાં આપવાનું નક્કી થયું હતું. આરોપીએ ૪.૫૦ લાખ લઇ ડોલરના બંડલમાં ઉપર ૧૦૦ ડોલરની નોટ અને અંદર ૧ ડોલરની નોટો મૂકી અમારી સાથે છેતરપિંડી કરી હતી. જે અંગે સોજીત્રા પોલીસ સ્ટેશનમાં અરજી આપી હતી.
ગત ૨૮ મી ઓક્ટોબરે ફરીથી આવી જ રીતે ફરીથી મારા વોટ્સએપ પર મેસેજ આવ્યો હતો. મેં કોલ કરતા મેસેજ કરનાર વ્યક્તિએ પોતાની ઓળખાણ સ્વામિ નારાયણ સંપ્રદાયના સંત તરીકે આપી તેમનું મંદિર દાહોદ – ગોધરા એમ.પી. બોર્ડર પર હોવાનું જણાવ્યું હતું. મારી સાથે અગાઉ છેતરપિંડી કરનાર ટોળકીના સાગરીતો હોવાની શંકા જતા તેઓને પકડવા માટે મેં વાતચીત ચાલુ રાખી હતી. આરોપીઓએ અમને વડોદરા નજીકના સાંકરદા ગામે બોલાવતા મેં તથા મારા મિત્ર જીગરે સ્થાનિક પોલીસ સ્ટેશન નંદેસરીમાં જઇ સંપર્ક કર્યો હતો. પોલીસે છટકું ગોઠવીને ત્રિપુટીને ઝડપી પાડી છે.
તમે પાર્કિંગ લાઇટ ચાલુ રાખી ઉભા રહો, મારો માણસ આવે છે
૧૦૦ ડોલરની નોટ આપવા આવેલો એક આરોપી રંગેહાથ ઝડપાયો
વડોદરા,
લોન કન્સલ્ટન્ટે જણાવ્યું હતું કે, પોલીસ ે બીજી ગાડીમાં આવી હતી.અમે સાંકરદા બ્રિજ નીચે પાર્કિંગ લાઇટ ચાલુ કરીને ઉભા હતા. ત્યારબાદ આરોપીએ કોલ કરીને કહ્યું કે, તમે આગળ નીકળી ગયા છો. પાછા આવો. મારો માણસ લાલ કલરનું શર્ટ અને બ્લ્યૂ જીન્સ પહેરીને ઉભો છે. જેથી, અમે ગાડી રિવર્સ લઇને આવતા એક છોકરો મળ્યો હતો. તેણે અમને ૧૦૦ ડોલરની બે નોટ આપી હતી. તેવામાં જ પોલીસે દોડી આવી તેને પકડી લીધો હતો. તેનું નામ મુકેશ કનુભાઇ તળપદા હોવાનું જાણવા મળ્યું હતું.
પોલીસથી બચવા માટે ભાગતા આરોપીઓની કાર થાંભલા સાથે અથડાઇ
વડોદરા,
પકડાયેલા આરોપી મુકેશ પાસેથી ૧૦૦ ડોલરની પાંચ નોટ મળી આવી હતી. તેની સાથે કારમાં અમતિભાઇ ગોવિંદભાઇ તળપદા અને જીજ્ઞોશભાઇ કીરિટભાઇ તળપદા હોવાનું જણાવ્યું હતું. પોલીસ તેઓ સુધી પહોંચે તે પહેલા જ આરોપીઓએ કાર હંકારી દેતા પોલીસે કારનો પીછો કર્યો હતો. આરોપીઓની કાર સાંકરદાથી બાબરપુરા ગામ તરફ જવાના રસ્તા પર થાંભલા સાથે અથડાઇ હતી. જેથી,પોલીસે દોડી જઇ કારમાંથી બે વ્યક્તિઓને ઇજાગ્રસ્ત હાલતમાં બહાર કાઢી સારવાર માટે લઇગયા હતા.
