– 2 ઘરફોડ ચોરીનો ભેદ ઉકેલાયો
– લોકલ ક્રાઈમબ્રાન્ચે સોના ચાંદીની લગડી, ઘરેણાં, રોકડ રકમ અને મોબાઈલ મળી રૂ. 5.70 લાખનો મુદ્દામાલ કબ્જે લીધો
ભાવનગર : ભાવનગર શહેરના બંધ મકાનને નિશાન બનાવી ચોરીને અંજામ આપતી તસ્કર બેલડીને લોકલ ક્રાઈમબ્રાન્ચે સોના-ચાંદીના ઘરેણા અને રોકડ રકમ મળી રૂ.૫.૭૦ લાખના મુદ્દામાલ સાથે ઝડપી લઇ કાયદેસરની કાર્યવાહી હાથ ધરી છે.
ભાવનગર લોકલ ક્રાઇમબ્રાન્ચનો ભાવનગર શહેર વિસ્તારમાં વણશોધાયેલ મિલકત સંબંધી ગુન્હાઓના શકદારોની તપાસમાં હતાં. તે દરમ્યાન બાતમી મળેલ કે, ભાવનગર, જેલ ગ્રાઉન્ડ પાસે આવેલ સરકારી કવાટર્સની બાજુમાં આવેલ લીમડાના ઝાડ નીચે દિનેશ કાનાભાઇ તથા જીતુ ધીરૂભાઇ (રહે.બંને ભાવનગર) નામના શખ્સ સોના-ચાંદિના દાગીના તથા રોકડ રકમ સાથે બેઠા છે. જે બાતમીના આધારે લોકલ ક્રાઈમ બ્રાન્ચના સ્ટાફે દરોડો પાડી બન્ને શખ્સને ઉઠાવી લીધા હતા. પકડાયેલા બન્ને શખ્સ પાસેથી સોના-ચાંદીની લગડી અને સોના ચાંદીના ઘરેણાં તથા રોકડ રકમ મોબાઈલ મળી કુલ રૂ.૫,૭૦,૯૧૦નો મુદામાલ કબ્જે કર્યો હતો. પકડાયેલા શખ્સોની આગવી ઢબે પૂછપરછ હાથ ધરતા આજથી છ-સાત દિવસ પહેલાં કાળીયાબીડ, પાણીના ટાંકી પાસેથી વિરાણી સર્કલ તરફ જતાં રોડ ઉપર આવેલ એક બંધ મકાનના સાઇડના રસોડાનો દરવાજો તોડી નંબર-૦૨નાએ મકાને આવેલ રૂમમાં રાખેલ કબાટની તિજોરીમાં રાખેલ સોના-ચાંદીની લગડીઓ, દાગીના રોકડ રૂપિયાની ચોરી કરી હતી. તેમજ છએક મહિના પહેલાં કાળીયાબીડ, સાગવાડીમાં આવેલ વિકટોરીયાની દિવાલ પાસે એક બંધ મકાનમાં ચોરી કરેલ, જેમાં રોકડ રૂ.૨૫,૦૦૦ તથા સોનાનો ચેઇનની ચોરી કરી હોવાની કબૂલાત કરતાં બન્ને ઇસમને વધુ કાર્યવાહી થવા માટે તેઓને નિલમબાગ પોલીસ સ્ટેશનમાં સોંપી આપવામાં આવેલ છે.
પકડાયેલા બન્ને શખ્સની મોડસ ઓપરેન્ડી
દિનેશ કાનાભાઇ વાઘેલા જીતુ ઉર્ફે જીતીયો ધીરૂભાઇ સરવૈયાને ભાવનગર શહેર ખાતે બોલાવી અલગ-અલગ વિસ્તારમાં રેકી કરીને બંધ મકાન નિશાન બનાવી ચોરીને અંજામ આપતા હતા. જીતુ ઉર્ફે જીતીયો ધીરૂભાઇ સરવૈયા અગાઉ સુરેન્દ્રનગર તથા વઢવાણ પોલીસ સ્ટેશનમાં ઘરફોડ ચોરીના ચાર ગુનામાં પકડાયેલ છે.
