શહેરના તરસાલી બ્રિજ પાસેથી ગૌરક્ષકોએ ૧૯ પશુ ભરેલી ટ્રક ઝડપી પાડી છે. ટ્રકચાલકે ગૌરક્ષકોએ માર માર્યો હોવાની ફરિયાદ કરી હતી. બંને પક્ષની ફરિયાદના આધારે કપુરાઈ પોલીસે ૧૬ પશુઓ સહિત રૂ. ૬.૪૦ લાખનો મુદ્દામાલ કબ્જે કરી સગીર સહિત ૬ આરોપીઓ સામે કાર્યવાહી હાથ ધરી હતી.
શહેરના ગોરવા વિસ્તારમાં રહેતા ગૌરક્ષક સતીશ પરમારે ફરિયાદમાં કહ્યું હતું કે, તા. ૨૦ નવેમ્બરે રાત્રે ૮ વાગ્યે કપુરાઈ ચોકડી પાસે ડભોઈ તરફથી આવેલ એક આઇશર ટ્રકને ઊભી રાખવા પ્રયાસ કર્યો હતો. જોકે ચાલકે ટ્રક ઊભી ન રાખતા અમે પીછો કરી જાંબુઆ બ્રિજ નીચેથી તરસાલી તરફ જતા સિધે શ્વર હિલ ફ્લેટ પાસે ટ્રકને રોકી હતી. ટ્રક ચાલક સહજાદ સાબન શા અને બાજુમાં બેઠેલો૧૫ વર્ષનો કિશોર (બંને રહે-વ્યારા, તાપી) હોવાનું જાણવા મળ્યું હતું.
ટ્રકની બોડીના પાછળના ભાગે તાડપત્રી હટાવીને જોતા કતલના ઈરાદે લઈ જવાતા ખીચોખીચ ભરેલા પશુઓ મળી આવ્યા હતા. ઉક્ત ફરિયાદના આધારે પોલીસે બંને આરોપીઓ સામે પશુ કૂરતા અધિનિયમ હેઠળ ગુનો નોંધી ૧૯ પશુઓને દરજીપુરા પાંજરાપોળ ખાતે મોકલી આપી ટ્રક સહિત કુલ રૂ. ૬.૪૦ લાખનો મુદ્દામાલ કબજે કર્યો હતો. સહજાદ શાએ ફરિયાદમાં કહ્યું હતું કે, અમે ડભોઈના વેગા ગામથી ૧૬ પશુઓ ભરીને સુરત નાની નરોલી ખાતે જઈ રહ્યા હતા. સિધ્ધેશ્વર હિલ ફ્લેટ સામે ટ્રાફિક હોવાથી ટ્રક ઊભી રાખી દીધી હતી. દરમિયાન પિકઅપ ગાડી અને બાઇક પર ચાર અજાણ્યા શખ્સો હાથમાં ઠંડા લઈ આવી પહોંચ્યા હતા. ટૂંકમાં પશુઓ ભરીને કતલ ખાને લઈ જાવ છો તેમ કહી અમને ગડદાપાટુનો માર મારી ટ્રકની કેબિનનો કાચતોડી નાખ્યો હતો. ઉક્ત ફરિયાદના આધારે પોલીસે ચાર અજાણ્યા શખ્સો વિરુદ્ધ મારામારી સહિતની કલમો હેઠળ ગુનો નોંધ્યો હતો.
