– ઓનલાઇન મિત્રતા કેળવીને મહિલા સાથે વિશ્વાસઘાત કર્યો
– અંજાર તાલુકાની પરિણીતાને અલગ અલગ સ્થળે લઈ જઈને દુષ્કૃત્ય આચર્યું પીએસઆઈએ પણ અડપલાં કરીને વીડિયો ઉતાર્યો હોવાનો ફરિયાદમાં આક્ષેપ
ગાંધીધામ: કચ્છના અંજાર તાલુકાના મેઘપર બોરીચી ગામે રહેતી પરિણિત મહિલાને ભગાડી તેની સાથે દુષ્કર્મ આચાર્યાની ફરિયાદ અંજાર પોલીસ મથકે નોંધાવાઈ છે. ભોગ બનનાર મહિલાએ ઓનલાઈન એક પુરૂષ સાથે મિત્રતા કરી હતી. જે શખ્સે મહિલાના ઘરે જઈ અને તેને ભગાડી ડાકોર ખાતે લઇ ગયા બાદ ત્યાં આરોપીના મિત્ર ડાકોર પીએસઆઈએ મહિલાનો અશ્લીલ વીડિયો ઉતાર્યો હોવાનો આક્ષેપ કરાયો છે. અંજાર પોલીસે મહેસાણા જિલ્લામાં રહેતા આરોપી અને મદદગારી કરનાર ડાકોરના પીએસઆઈ સહિત પાંચ શખ્સો સામે ગુનો નોંધી વધુ તપાસ હાથ ધરી છે.
અંજાર પોલીસમાં ભોગ બનનાર મહિલાએ નોંધાવેલી ફરિયાદમાં આક્ષેપ કરતા જણાવ્યું હતું કે, મહેસાણાના બાસણા ગામે રહેતો આરોપી ગૌરવ બાબુભાઈ ચૌધરી સાથે મહિલાની ઓનલાઈન મિત્રતા થઈ હતી અને આરોપી તા. ૧૦-૭-૨૫ના સવારના સમયે મહિલાના ઘરે આવ્યો હતો અને કપડાં અને જે પણ હોય તે લઈ અને મારી સાથે ચાલ એવું કહ્યું હતું. જેથી મહિલાએ ઘરમાં પડેલા રૂ. ૧. ૨૦ લાખ અને કપડાં ભરેલો બેગ લઈ ગૌરવ સાથે બોલેરોમાં બેસી નીકળી ગઈ હતી.
આ દરમિયાન ગૌરવના મિત્ર વિસનગરના મગરોડા ગામના વતની અને ડાકોર પોલીસ સ્ટેશનના પીએસઆઈ આકાશ ચૌધરીનો તેને ફોન આવ્યો હતો અને ડાકોર આવી જવાનું કહેતા તે ડાકોરની હોટેલમાં પહોંચ્યા હતા. જ્યાં પીઈએસઆઈ આકાશ પણ પહોંચ્યો હતો અને આકાશે મહિલા સાથે અડપલાં કરી તેનો અશ્લીલ વિડીયો ઉતાર્યો હોવાનો આક્ષેપ કરાયો છે. તે બાદ ત્યાંથી પીએસઆઈ ચાલ્યો ગયો હતો. જ્યારે આરોપી ગૌરવે મહિલા સાથે દુષ્કર્મ આચર્યું હતું એના બીજા દિવસે આકાશે પાવાગઢ જતા રહેવાનું કહેતા તેઓ ગયા હતા. ત્યાં પણ ગૌરવે મહિલા પર દુષ્કર્મ આચાર્યું હતું. જે બાદ આકાશે ગોધરા જવાનું કહેતા તેઓ ત્યાં ગયા હતા અને ત્યારથી એક કાર તેમને લેવા અમદાવાદથી આવી હતી તેના ડ્રાઈવરે મહિલાને તેના બાળકોને મારી નાખવાની ધમકી આપી હતી.
જે બાદ ફરિયાદી મહિલા અને ગૌરવ અમદાવાદ આવ્યા હતા. જ્યાં ગૌરવની બહેન મળી હતી જેણે ભોગ બનનાર મહિલાને ખેરાલુ મોકલી હતી. જે બાદ ગૌરવ મહિલાને ખેરાલુથી તેના ગામ બાસણા ખાતે લઈ ગયો હતો. જ્યાં ગૌરવના ઘરે તેની બીજી બહેન પણ હતી અને આરોપીની બંને બહેનોએ ફરિયાદી મહિલાને ધમકાવી હતી. જેના બીજા દિવસે મહિલાના માતા-પિતા બાસણા ગામે આવ્યા હતા. મહિલા તેના પિયર જતી રહી હતી. જે બાદ ગૌરવ બાબુ ચૌધરી, આકાશ ચૌધરી અને ગૌરવની બંને બહેનો અને ગોધરાથી અમદાવાદ લઈ જનાર કારના ડ્રાઇવર વિરુદ્ધ મહિલાએ ફરિયાદ નોંધાવી હતી.
પોલીસે જણાવ્યું હતું કે, ગૌરવનો મિત્ર આકાશ ચૌધરી જે ગુજરાત પોલીસમાં પીએસઆઇ તરીકે ફરજ બજાવે છે. જેના હિસાબે ગૌરવે તેને મેઘપર બોરીચીથી લઈ પહેલા ડાકોર બાદ પાવાગઢ બાદ ગોધરા અને તે બાદ અમદાવાદ ખાતે લઈ ગયો હતો અને આ આકાશે એજ ગૌરવ સાથે મળી મહિલાનો અશ્લીલ વીડિયો પણ ઉતાર્યોે હતો.
આમ, આ બનાવમાં પીએસઆઈ આકાશ ચૌધરીના ઈશારે ગૌરવ મહિલાને અનેક જગ્યાએ લઈ ગયો હતો અને બળાત્કાર ગુર્જાયો હતો. તેમજ આકાશે પણ મહિલા સાથે અડપલા કર્યાનું અને અશ્લીલ વીડિયો ઉતારી લીધાનું પોલીસ ફરિયાદમાં ઉલ્લેખ કરાયો છે.
