Alcohol prohibition In Gujarat: ગુજરાતમાં દારૂ-ડ્રગ્સના દૂષણને લઈને વિપક્ષે આક્રમક રુખ અપનાવ્યું છે અને જેને જનસમર્થન પણ સાંપડી રહ્યુ છે. પરિણામે ભાજપ સરકારે બેકફુટ પર આવવુ પડ્યું છે. જો કે, હવે ગુજરાતની દારૂબંધીનો મુદ્દો છેક સંસદ સુધી પહોંચ્યો છે. રાજસ્થાનના સાંસદે ગુજરાતની દારૂબંધી મુદ્દે સવાલ ઊઠાવ્યા હતાં. ત્યારે હવે દીવના સાંસદ ઉમેશ પટેલે સંસદમાં એવો મુદ્દો છેડ્યો હતોકે, ગુજરાતમાં કેવી દારૂબંધી છે?, ખુદ સરકાર જ દારૂ પીવા માટે પરમીટ આપી રહી છે. આવું હોય ખરું?
કરોડો રૂપિયાનો દારૂનો કાળો કારોબાર
સંસદમાં ગુજરાતની દારૂબંધીનો સતત મુદ્દો ઊઠી રહ્યો છે પરિણામે રાજ્ય સરકારની ફજેતી થઈ છે. દીવના સાંસદ ઉમેશ પટેલે સાંસદમાં મુદ્દો ઉઠાવી એવો આક્ષેપ કર્યો કે, ‘પ્રતિબંધ હોવા છતાં પણ ગુજરાતમાં ગલીએ ગલીએ દારૂ વેચાઇ રહ્યો છે. મજાની વાત તો એછેકે, જે ગુજરાતમાં દારૂબંધી અમલમાં છે તે રાજ્યમાં ખુદ સરકાર જ લોકોને દારૂ પીવા માટે પરમીટ આપી રહી છે. તો દારૂબંધીનો અર્થ શો? તે સમજાતુ નથી. પ્રતિબંધ માત્ર નામ પુરતો જ છે કેમકે, ગુજરાતમાં આજે પણ 77 હોટલ-રિસોર્ટમાં દારૂ વેચાઇ રહ્યો છે.’
આ પણ વાંચો: બેટી બચાવો- બેટી પઢાઓ યોજનામાં કેન્દ્ર સરકારે ગુજરાતને ફદિયું પણ આપ્યું નહીં
ગંભીર આરોપ લગાવતા ઉમેશ પટેલે કહ્યું કે, ‘ગુજરાતમાં 25-30 હજાર કરોડ રૂપિયાનો દારૂનો કાળો કારોબાર ફુલ્યો ફાલ્યો છે. પરિણામે એવુ થયુ છેકે, સરકારની તિજોરીને નુકસાન પહોચી રહ્ય્યું છે. ખરેખર તો દારૂની છૂટ અપાય તો સરકારને મોટી આવક થાય તેમ છે.’
કોંગ્રેસના સાંસદ ગેનીબેન ઠાકોરે સંસદમાં દારૂ મુદ્દો ઉઠાવ્યો
બીજી તરફ કોંગ્રેસના સાંસદ ગેનીબેન ઠાકોરે પણ સંસદમાં આ જ મુદ્દો ઉઠાવતાં કહ્યું કે, ‘ગુજરાતમાં ખેડૂતો ખાતર માટે ફાંફા મારી રહ્યાં છે પણ દારૂની તો હોમ ડીલીવરી થઈ રહી છે. માંગો તો દારૂ ઘેર પહોચી જાય છે. રવિ સિઝનનો પ્રારંભ થયો છે ત્યારે ખેડૂતોને પુરતા પ્રમાણમાં ખાતર મળતુ નથી તે મુદ્દે સરકારે કાળાબજારીયાઓ સામે પગલાં ભરવા જોઇએ તેવી તેમણે માંગ કરી હતી.’
ઉલ્લેખનીય છે કે, ગુજરાતમાં દારૂની પરમીટોની સંખ્યા પણ દીને દીને વધી રહી છે. વર્ષ 2023 અને વર્ષ 2024માં અમદાવાદ, સુરત, વડોદરા, ગાંધીનગર, ભાવનગર અને રાજકોટમાં સ્વાસ્થયના બહાને કુલ મળીને 4886 દારૂની પરમીટો આપી છે.
