વડોદરાઃ સસ્તું સોનું અને ૧૦ કરોડની લોન અપાવવાના નામે કર્ણાટકના વેપારી સાથે રૃ.૪.૯૨ કરોડની ઠગાઇ કરવાના બનાવની તપાસ જે પી રોડ પોલીસ પાસેથી ક્રાઇમ બ્રાન્ચને સોંપાતા પોલીસે બહુનામધારી સૂત્રધાર ઇલિયાસ અને સાગરીતોની તપાસ હાથ ધરી છે.
કર્ણાટકના વેપારી મંજુ આર.રવિ સાથે પરિચય થયા બાદ વડોદરાના મુજમહુડા વિસ્તારમાં સિગ્નેટ હબ ખાતે ઓફિસ ધરાવતા વિશાલ બારડ,નયના મહિડા અને એટલાન્ટિસ બિલ્ડિંગમાં રાધે ફાઇનાન્સ એન્ડ ઇમ્પોર્ટ એક્સ્પોર્ટની ઓફિસ ધરાવતા રાજવીર પરીખ ઉર્ફે ઇલિયાસ અજમેરીએ રૃ.૪.૯૨ કરોડ પડાવી લીધા હતા.
આ બનાવ અંગે જે પી રોડ પોલીસ સ્ટેશનમાં ગુનો નોંધાયો હતો.જેમાં ઇલિયાસ સામે અગાઉ પણ ગુના નોંધાયા હોવાની વિગતો બહાર આવી હતી.ઇલિયાસના ભાઇ ઇદ્રિશને ત્યાં પોલીસે દરોડો પાડતાં તેને ત્યાંથી ૧.૬૨ કરોડની ચિલ્ડ્રન કરન્સી અને ડુપ્લિકેટ સોનાના ૩ કિલો બિસ્કિટ મળી આવ્યા હતા.
ક્રાઇમ બ્રાન્ચના પીઆઇ હેતલ તુવર અને ટીમ દ્વારા ઉપરોક્ત ગેંગનું નેટવર્ક ભેદવા માટે ઇલિયાસના આશ્રય સ્થાનો પર દરોડા પાડયા હતા.પરંતુ આરોપીઓ ભૂગર્ભમાં ઉતરી ગયા છે તેમજ મોબાઇલ પણ સ્વીચ ઓફ કરી દીધા છે.
