અમદાવાદ, બુધવારં
શહેરના મેમનગરમાં આવેલી એક સોસાયટીમાં પોલીસે દરોડો પાડીને પાર્ક કરેલી કારમાં છુપાવેલી રૂપિયા નવ લાખની કિંમતનો વિદેશી દારૂની ૯૦૦ જેટલી બોટલ જપ્ત કરીને ત્રણ સ્થાનિક બુટલેગરોની ધરપકડ કરી છે. હરિયાણાથી ટ્રકમાં આવેલો દારૂ ચિલોડાથી કારમાં ભરીને છુપાવવામાં આવ્યો હતો. આ અંગે પોલીસે તપાસ શરૂ કરી છે.
ડીસીપી ઝોન-૧ સ્ક્વોડના સ્ટાફને ચોક્કસ માહિતી મળી હતી કે મેમનગરમાં આવેલી નૈમીનાથ કૃપા સોસાયટીની સામે આવેલી યુગાન્ડા સોસાયટી કારમાં મોટા પ્રમાણમાં વિદેશી દારૂ લવાયો છે અને ત્રણ શખ્સો તે સોસાયટીમાં બેઠા છે. જેના આધારે પોલીસ ઇન્સ્પેક્ટર એચ બી ગઢવી અને તેમના સ્ટાફે દરોડો પાડીને રૂચિત રાજપુત (રહે.શાસ્ત્રીનગર સરકારી વસાહત, નારણપુરા), જગદીશ સેવક (રહે. સર્વોદયનગર, ઘાટલોડીયા) અને કિન્નર મોદી (રહે. નેમીનાથ સોસાયટી, મેમનગર)ને ઝડપીને કારમાં તપાસ કરતા રૂપિયા નવ લાખની કિંમતની વિદેશી દારૂની ૩૦૦ જેટલી બોટલો મળી આવી હતી.
આ અંગે પુછપરછ કરતા જાણવા મળ્યું હતું કે ત્રણેય જણા કૃણાલ રાજપુત નામના વ્યક્તિ સાથે કાર લઇને નાના ચિલોડા ગયા હતા. જ્યાંથી ટ્કમાં લાવેલી દારૂની ૨૫ પેટી કારમાં મુકી હતી. જે સ્થાનિક વિસ્તારમાં સપ્લાય કરતા હતા. આરોપીઓ આગામી ૩૧મી ડિસેમ્બર માટે પણ મોટા પ્રમાણમાં દારૂ લાવવાની ગણતરીમાં હતા અને અગાઉ પણ મોટાપ્રમાણમાં દારૂ લાવી ચુક્યા હતા. આ અંગે પોલીસે વધુ તપાસ શરૂ કરી છે
