– ગૂગલ, માઇક્રોસોફ્ટ પછી વધુ એક દિગ્ગજ કંપનીની જાહેરાત
– જેફ બેઝોસની એમેઝોન ભારતમાં 2010થી અત્યાર સુધીમાં 40 અબજ ડોલરનું રોકાણ કરી ચૂકી છે
નવી દિલ્હી : અમેરિકન પ્રમુખ ટ્રમ્પ ભારત પર ટેરિફ નાખી રહ્યા છે તો તેનાથી વિપરીત અમેરિકન કંપનીઓ ભારતમાં રોકાણ કરવા થનગની રહી છે. ગૂગલ, માઇક્રોસોફ્ટ પછી વધુ એક દિગ્ગજ કંપની એમેઝોને ભારતમાં ૩૫ અબજ ડોલર એટલે કે ૩ લાખ કરોડથી પણ વધુ રકમનું રોકાણ કરવાની જાહેરાત કરી છે. કંપની આ રોકાણ આગામી પાંચ વર્ષમાં કરશે એમ તેણે જણાવ્યું છે.
એમેઝોને પોતાના ઇન્ડિયા પ્લાનનું એલાન બુધવારે ૧૦ ડિસેમ્બરના રોજ નવી દિલ્હીમાં આયોજિત એમેઝોન સંભવ શિખર દરમિયાન કર્યુ. કંપનીએ જણાવ્યું હતું કે તે આર્ટિફિશિયલ ઇન્ટેલિજન્સ અને લોજિસ્ટિક સેક્ટરમાં રોકાણ કરશે. તેના કારણે બીજી ૧૦ લાખ નોકરીઓનું સર્જન કરવામાં મદદ મળશે.
એમેઝોન ભારતમાં વોલમાર્ટ સમર્થિત ફ્લિપકાર્ટની સાથે મુકેશ અંબાણી સમર્થિત ઇન્સ્ટિટન્ટ ડિલિવરી ફર્મ જેવી કે એટર્નલ લિમિટેડની બ્લિન્કિ, સ્વિગી લિમિટેડની ઇન્સ્ટામાર્ટ અને ઝેપ્ટો સાથે સ્પર્ધા કરવા કમર કસી છે. ભારતમાં ૨૦૧૦માં એન્ટ્રી કરનારી એમેઝોન દેશમાં અત્યાર સુધીમાં ૪૦ અબજ ડોલરનું રોકાણ કરી ચૂકી છે. ૨૦૨૩માં તેણે ભારતમાં બીજા ૨૬ અબજ ડોલરના રોકાણની જાહેરાત કરી હતી.
એમેઝોનના નવા રોકાણના પરિણામે ભારતના વેચનારાઓને તેમની નિકાસ હાલના ૨૦ અબજ ડોલરથી વધારીને ૮૦ અબજ ડોલરે લઈ જવામાં મદદ મળશે. એમેઝોને તેના રોકાણ અંગે જણાવ્યું હતું કે તેનું રોકાણ દેશની અગ્રતાઓની સાથે વ્યૂહાત્મક રીતે જોડાયેલુ છે. તેમા લોજિસ્ટિક્સ ઇન્ફ્રાસ્ટ્રકચરને વેગ આપવો, નાના કારોબારમાં વૃદ્ધિ તથા રોજગાર સર્જનનો સમાવેશ થાય છે.
એમેઝોનના ઇમર્જિંગ માર્કેટ્સના હેડ અમિત અગ્રવાલે જણાવ્યું હતું કે અમને ભારતની વૃદ્ધિના પ્રેરકબળ બનતા રોમાંચની લાગણી થાય છે. તેની સાથે અમે કરોડો ભારતીયો માટે એઆઈનું એક્સેસ પણ સુલભ કરાવી શકીશું. એમેઝોન તેલંગણા અને મહારાષ્ટ્રમાં લોકલ ક્લાઉડ અને એઆઈ ઇન્ફ્રાસ્ટ્રકચર સ્થાપવાની જાહેરાત કરી ચૂકી છે.
અગ્રવાલે જણાવ્યું હતું કે કંપની ફિઝિકલ અને ડિજિટલ ઇન્ફ્રાસ્ટ્રકચર પાછળ જંગી રોકાણ કરી રહી છે. તેમા ફુલફિલમેન્ટ સેન્ટરો, પરિવહન નેટવર્ક, ડેટા સેન્ટરો, ડિજિટલ પેમેન્ટ્સ, ડિજિટલ પેમેન્ટ્સ ઇન્ફ્રાસ્ટ્રકચર અને ટેકનોલોજી ડેવલપમેન્ટનો સમાવેશ થાય છે. કીસ્ટોન રિપોર્ટ મુજબ એમેઝોને ભારતમાં ૧.૨ કરોડ નાના ઉદ્યોગોને ડિજિટાઇઝ કર્યા છે અને ૨૦ અબજ ડોલરની ઇકોમર્સ નિકાસને સમર્થન પૂરુ પાડયુ છે. આના કારણે પ્રત્યક્ષ અને પરોક્ષ રીતે ૨૮ લાખ જોબ્સનું સર્જન થયું હતું.
ભારતના ઉત્પાદનની નિકાસમાં વૃદ્ધિ કરવા એમેઝોન મેન્યુફેક્ચરિંગ ફોકસ્ડ પહેલ એક્સીલરેટ એક્સપોર્ટ્સ પર ધ્યાન કેન્દ્રિત કર્યુ છે. તેના દ્વારા તે ડિજિટલ આંત્રપ્રિન્યોરની સાથે વિશ્વસનીય ઉત્પાદકો સાથે જોડાશે. આમ ઉત્પાદકોને સફળ વૈશ્વિક સેલર બનવામાં મદદ કરશે. આ પ્રોગ્રામના ભાગરૂપે એમેઝોન ભારતમાં તિરુપુર, કાનપુર અને સુરત સહિતના દસ ઉત્પાદન કેન્દ્રોને સાંકળથી ડ્રાઇવ ચલાવશે.
સંભવ સમિટમાં એમેઝોને એપેરેલ એક્સપોર્ટ પ્રમોશન કાઉન્સિલ ઓફ ઇન્ડિયાની સાથે ચાવીરુપ ભાગીદારીની જાહેરાત કરી હતી, જેથી તેનો કાર્યક્રમ રાષ્ટ્રવ્યાપી ધોરણે ચલાવી શકાય.
ભારતમાં જંગી રોકાણ
|
કંપની |
રકમ |
|
એમેઝોન |
૩૫ અબજ ડોલર |
|
માઇક્રોસોફ્ટ |
૧૭.૫ અબજ ડોલર |
|
ગૂગલ |
૧૫ અબજ ડોલર |
