Aravalli Accident: અરવલ્લી જિલ્લાના બાયડ અને સાઠંબા તાલુકા કોંગ્રેસ સમિતિના પ્રમુખ પ્રવીણસિંહ સોલંકીનું ગત રાત્રે માર્ગ અકસ્માતમાં મૃત્યુ નીપજ્યું છે. આ દુર્ઘટના બાયડ-કપડવંજ હાઈવે પર બોરલ ગામ નજીક લાકડા ભરેલા ટ્રેક્ટર સાથે બાઇકની ટક્કર થવાથી સર્જાઈ હતી. હાલ પોલીસે આ મામલે ગુનો નોંધીને વધુ તપાસ હાથ ધરી છે.
આ પણ વાંચો: સુરેન્દ્રનગર નજીક હિટ એન્ડ રનની ઘટના: અજાણ્યા વાહનની ટક્કરે ત્રણ યુવાનોના ઘટનાસ્થળે જ મોત
મળતી માહિતી અનુસાર, પ્રવીણસિંહ સોલંકી રાત્રિના સમયે પોતાની બાઇક પર જઈ રહ્યા હતા. બોરલ ગામ પાસેથી પસાર થતી વખતે લાકડા ભરેલા એક ટ્રેક્ટર સાથે તેમની બાઇક ધડાકાભેર અથડાઈ હતી. આ ગંભીર અકસ્માતમાં પ્રવીણસિંહ સોલંકીને માથામાં ગંભીર ઈજાઓ થવાથી તેમનું ઘટનાસ્થળે જ મૃત્યુ નિપજ્યું હતું. તેમના નિધનથી બાયડ અને સાઠંબા તાલુકા કોંગ્રેસ સમિતિમાં શોકની લાગણી ફેલાઈ ગઈ છે.
પોલીસ તંત્ર પર સ્થાનિકોના આક્ષેપો
આ અકસ્માત બાદ સ્થાનિકોમાં ગેરકાયદે પ્રવૃત્તિઓ સામે રોષ જોવા મળી રહ્યો છે. સ્થાનિકો દ્વારા પોલીસ તંત્ર પર ગેરકાયદે રીતે લાકડા ભરીને જતા ટ્રેક્ટરો સામે કડક કાર્યવાહી ન કરવાના આક્ષેપો કરવામાં આવી રહ્યા છે. સ્થાનિકોની માંગ છે કે જો આ ગેરકાયદે પ્રવૃત્તિઓ અને ઓવરલોડેડ વાહનો પર નિયંત્રણ નહીં આવે તો ભવિષ્યમાં વધુ નિર્દોષ રાહદારીઓ અને વાહનચાલકો જીવ ગુમાવી શકે છે.
