વડોદરાઃ એમ.એસ.યુનિવર્સિટી કેમ્પસની રેઢિયાળ સુરક્ષા વ્યવસ્થાને ઉજાગર કરતો વધારે એક ચોંકાવનારો કિસ્સો પ્રકાશમાં આવ્યો છે.યુનિવર્સિટીની ટેકનોલોજી ફેકલ્ટીના મિકેનિકલ એન્જિનિયરિંગ અને ટેક્સટાઈલ કેમેસ્ટ્રી વિભાગની ૧૦ લેબોરેટરીઓની ચાવીઓ ચોરાઈ જતા લેબોરેટરીઓના તાળા તોડવાનો વારો આવ્યો હતો.
ટેકનોલોજી ફેકલ્ટીના વિવિધ વિભાગની લેબોરેટરીઓની ચાવીઓ ફેકલ્ટીમાં એક જગ્યાએ કબાટમાં મૂકવામાં આવતી હોય છે.આ કબાટને કોઈ તાળું નથી મારવામાં આવતું.રોજ સવારે લેબોરેટરી ખોલવા માટે અધ્યાપકો ત્યાંથી જ ચાવીઓ લેતા હોય છે.ગત શુક્રવારે મિકેનિકલ અને ટેક્સટાઈલ કેમેસ્ટ્રી વિભાગની લેબોરેટરીઓની ચાવીઓ કબાટમાં હતી જ નહીં.તપાસ કર્યા બાદ પણ ચાવીઓ મળી નહોતી અને આ ઘટનાથી હંગામો મચી ગયો હતો.બંને લેબોરેટરીઓમાં મોંઘા ઉપકરણો પણ હોવાથી તેની સુરક્ષા મહત્વની બને છે.
એ પછી સિક્યુરિટીને બોલાવીને પૂછપરછ કરવામાં આવી હતી.ભારે શોધખોળ બાદ પણ ચાવીઓ નહીં મળતા આખરે તાળા તોડવામાં આવ્યા હતા અને ચાવીઓ લઈ જનાર વ્યક્તિ ડુપ્લિકેટ ચાવી બનાવી શકે છે તેવી આશંકાથી રાતોરાત નવા તાળા લાવવામાં આવ્યા હોવાનું સૂત્રોનું કહેવું છે.
રાત્રે આવીને એક વિદ્યાર્થીએ ચાવી માગી હતી
સિક્યુરિટી જવાનોને બોલાવીને પૂછવામાં આવતા તેમણે કહ્યું હતું કે, ગુરુવારે મોડી એક વિદ્યાર્થીએ આવીને લેબોરેટરીની ચાવી માગી હતી અને તેણે કહ્યું હતું કે, મને અધ્યાપકે ગમે ત્યારે લેબોરેટરીમાં કામ કરવાની મંજૂરી આપી છે.જોકે તેને ચાવી આપવામાં આવી નહોતી.જ્યારે વિદ્યાર્થીએ પૂછપરછમાં કહ્યું હતું કે, મને લેબોરેટરીની ચાવી આપવાની સિક્યુરિટીએ ના પાડતા હું જતો રહ્યો હતો.લેબોરેટરીની ચાવીઓ અંગે મને કોઈ જાણકારી નથી.
આમ ચાવીઓ ગૂમ થવાની ઘટના ચોંકાવનારી હોવા છતા ફેકલ્ટી સત્તાધીશોએ તપાસ માટે કોઈ કમિટિ નથી બનાવી તેનું પણ અધ્યાપકોને આશ્ચર્ય છે.
