વડોદરા,દંતેશ્વર બરોડા સ્કૂલની સામે ફૂટપાથ પરથી મોડીરાત્રે એક યુવકનો મૃતદેહ શંકાસ્પદ હાલતમાં મળી આવતા પોલીસ દોડતી થઇ ગઇ હતી. યુવકના મોતનું કારણ જાણવા પોલીસે તપાસ શરૃ કરી છે.
મોડીરાત્રે પોણા બે વાગ્યે પોલીસને મેસેજ મળ્યો હતો કે, દંતેશ્વર બરોડા સ્કૂલની સામે રોડ પર એક ડેડબોડી પડી છે.યુવકને માથામાં આગળના ભાગે ઇજા થઇ હતી. પોલીસે નજીકમાં પડેલી બાઇકના રજિસ્ટ્રેશન નંબરના આધારે તપાસ કરતા મૃતકના પરિવારની માહિતી મળી હતી.દંતેશ્વર રણજીત નગરમાં રહેતા રાકેશભાઇએ પોલીસને જણાવ્યું હતું કે, મરણ જનાર મારો ભાણેજ જયેશ કૈલાસભાઇ કાયસ ( ઉં.વ.૨૬) (રહે. રણજીતનગર, દંતેશ્વર) છે. પોલીસે મૃતદેહને પી.એમ. માટે સયાજી હોસ્પિટલમાં મોકલી આપ્યો છે. મકરપુરા પી.આઇ. એ.એમ.ગોહિલે જણાવ્યું હતું કે, પી.એમ.ના પ્રાથમિક રિપોર્ટના આધારે અકસ્માતનો કેસ છે. બાઇક સ્લિપ થઇ જતા ઇજા થતા તેનું મોત થયું હોવાનું હાલના તબક્કે લાગી રહ્યું છે. બાઇક સ્લિપ થઇ ગઇ હોય તો યુવક ફૂટપાથ પર કઇ રીતે પડયો ? તે અંગે પોલીસ તપાસ કરી રહી છે. પોલીસે જણાવ્યું છે કે, યુવકના મોતનું ચોક્કસ કારણ જાણવા માટે ઘટના સ્થળની નજીકના સીસીટીવી ફૂટેજની ચકાસણી કરી રહ્યા છે. પોલીસનું કહેવું છે કે, યુવક જી.આઇ.ડી.સી.માં નોકરી કરતો હતો.મોડીરાત્રે એક ફંક્શનમાંથી તે પરત આવી રહ્યો હતો. તે દરમિયાન આ ઘટના બની છે.
