અંબાજી થી વિરમપુર રોડ પરથી લાખોની કિંમતના ખેરના લાકડા ભરેલી પીકઅપ ગાડી ઝડપાઈ
2 આરોપીઓની ધરપકડ
બનાસકાંઠા વન વિભાગ દ્વારા ગેરકાયદેસર વૃક્ષ છેદન અને પરિવહન સામે લાલ આંખ કરવામાં આવી છે. નાયબ વન સંરક્ષક અને મદદનીશ વન સંરક્ષકના સીધા માર્ગદર્શન હેઠળ અંબાજી ઉત્તર રેન્જની ટીમે રાત્રી પેટ્રોલિંગ દરમિયાન એક મોટી સફળતા મેળવી હતી.
જેમાં ગત રાત્રિએ અંબાજી રેન્જ ફોરેસ્ટ ઓફિસરની સૂચનાથી વનરક્ષકોની ટીમ પેટ્રોલિંગમાં હતી. તે દરમિયાન અંબાજી-વિરમપુર રોડ પર સિંબલપાણી નજીક એક શંકાસ્પદ પીકઅપ ગાડી (નંબર: GJ 20 U 3686) ને અટકાવવાનો પ્રયાસ કરતા તે નાસી છૂટી હતી. વન વિભાગની ટીમે ફિલ્મી ઢબે પીછો કરી દાંતા-હડાદ રોડ પર ગાડીને આંતરી લીધી હતી.
ગાડીની તલાશી લેતા તેમાંથી અંદાજે 2500 કિલો લીલા ખેરના લાકડાનો જથ્થો મળી આવ્યો હતો. ડ્રાઈવર પાસે કોઈ પણ પ્રકારની પાસ-પરમિટ કે કાગળો મળી આવ્યા ન હતા. વન વિભાગે આ બાબતે:
1. શાહરૂખખાન જહાંગીખાન પઠાન (રહે. હડાદ)
2. શેહજાદખાન જાકીરખાન પઠાન (રહે. હડાદ)
ની ધરપકડ કરી છે.
આ મામલે ભારતીય વન અધિનિયમ 1927 ની કલમ 41(2)બી મુજબ ગુનો નોંધી આગળની કાયદેસરની કાર્યવાહી હાથ ધરવામાં આવી છે. આ સફળ કામગીરીમાં વનરક્ષક બી.જે. ચૌધરી, પી.બી. સોલંકી, એમ.એચ. રાજપૂત, વી.એ. ચૌધરી, સી.એમ. પરમાર અને બી.ડી. ગોહિલ જોડાયા હતા.
રિપોટર પ્રહલાદ પુજારી અંબાજી
