Bootlegger Anil Pandya: ગુજરાતમાં વર્ષેદહાડે અબજો રૂપિયાનો દારૂ ઠાલવવાનું નેટવર્ક દુબઈથી ચલાવતો રાજસ્થાનનો બુટલેગર અનિલ પાંડ્યા આખરે દુબઈથી ઝડપાયો છે. મહિનાઓની કવાયત પછી દુબઈમાં નકલી પાસપોર્ટ આધારે પહોંચેલો અને ઓળખ બદલીને રહેતા અનિલ પાંડ્યાને આખરે ઝડપી લેવામાં સફળતા મળી છે. ગુજરાતમાં દારૂના બે ડઝન જેટલા ઉપરાંત વતન રાજસ્થાનમાં હત્યા, ખંડણી સહિતના 50થી વધુ ગુના એક લાખના ઈનામી બુટલેગર સામે હતું. તેને દુબઈથી પ્રત્યાર્પણ સંધિથી લાવી ડીજીપી સ્કવોડ ઊંડી તપાસ કરશે. સૌથી મોટા બુટલેગરનું ગુજરાતમાં દારૂનું નેટવર્ક તૂટવાની આશા જાગી છે.
બુટલેગર અનિલ પાંડ્યા કેવી રીતે ઝડપાયો?
રાજસ્થાનના સિકર જિલ્લાના રૂપનગરનો વતની અનિલ પાંડ્યા ઉર્ફે જગદીશ પ્રસાદ જાટ દુબઈમાં બેઠાં-બેઠાં ગુજરાતમાં અબજો રૂપિયાનો દારૂ ઠાલવતો હતો. રાજસ્થાન-ગુજરાત વચ્ચે પોતાની ગેંગ મારફતે મજબૂત નેટવર્ક ગોઠવીને દારૂની હેરાફેરી કરતાં બુટલેગરને ઝડપવા માટે એક લાખ રૂપિયાનું ઈનામ પણ ગુજરાત પોલીસે જાહેર કર્યું હતું. અનિલ પાંડ્યાનું ગુજરાતમાં નેટવર્ક સંભાળતો તૌફિક નાઝીરખાન દસ મહિના પહેલાં દુબઈથી ડિપોર્ટ કરવામાં આવતાં કેરળથી ઝડપી લેવામાં આવ્યો હતો. હવે અનિલ પાંડ્યા દુબઈમાં ઝડપાયો છે.
આ પણ વાંટો: અમદાવાદનો એસ.જી.હાઈવે બનશે આઈકોનિક રોડ, કોમનવેલ્થ ગેમ્સ 2030ની તૈયારીઓ શરૂ
મુળ રાજસ્થાનના અનિલ પાંડયા અને તેના સાગરિત તૌફિક સામે રાજસ્થાનમાં હત્યા, હત્યાની કોશિષ, ખંડણી, હથિયારોની હેરાફેરી, ગેંગ ચલાવવી, એક્સ્પ્લોઝીવ એક્ટ હેઠળ 39 ગુના નોંધાયેલાં છે. ગુજરાતમાં દારૂ ઠાલવવાનું નેટવર્ક રાજસ્થાનથી ચલાવતી અનિલ પાંડ્યા નકલી ઓળખ ઊભી કરીને બનાવટી પાસપોર્ટના આધારે દુબઈ નાસી છૂટ્યો હતો. છેલ્લા પાંચેક વર્ષથી અનિલ પાંડ્યા દુબઈમાં બેઠા બેઠાં જ ગુજરાતમાં દારૂ ઘુસાડવાનું નેટવર્ક ફોનથી ચલાવતો હતો. પ્રતિબંધ છતાં વર્ષેદહાડે અબજો રૂપિયાનો દારૂ ઘુસાડી ધૂમ નફાખોરી કરતાં અનિલ પંડયાએ દુબઈમાં બનાવટી ઓળખ ઊભી કરી ગુજરાતમાં ગેરકાયદે વેચેલા દારૂના પૈસાથી ધંધો શરૂ કર્યો હોવાની વિગતો છે.
અનિલ પાંડ્યા દુબઈમાં ખોટી ઓળખ અને બનાવટી પાસપોર્ટથી રહેતો હતો તેવી જાણકારી બાદ ગુજરાત પોલીસે તે અનિલ પાંડ્યા જ હોવાની ખરાઈ કરી હતી. ખરાઈ થયા પછી ગુજરાત સ્ટેટ મોનિટરીંગ સેલ એટલે કે ડીજીપી સ્કવોડે દુબઈ સાથેની પ્રત્યાર્પણ સંધિના આધારે બુટલેગર અનિલ પાંડ્યાને ઝડપી લેવા દુબઈ સરકારને આપીલ કરી હતી. દુબઈ સરકારે ગુજરાતના મોસ્ટ વોન્ટેડ બુટલેગર અનિલ પાંડ્યાને સકંજામાં લીધો છે. હવે, ગુજરાત સરકાર અને સ્ટેટ મીનિટરીંગ સેલ પ્રત્યાર્પણ સંધિ હેઠળ અનિલ પાંડ્યાનો કબજો મેળવવા સક્રિય બન્યાં છે.
બુટલેગરની મોડસ ઓપરેન્ડી
બુટલેગર અનિલ રાજસ્થાન, હરિયાણા અને પંજાબની ડિસ્ટીલરીમાંથી એક જ બેચ નંબરનો ડબલ માલ બનાવડાવી વિદેશમાં બેઠાં બેઠાં દિલ્હી, ઉત્તર પ્રદેશ, મધ્ય પ્રદેશ અને રાજસ્થાન રૂટથી ગુજરાતમાં ઠાલવી રહ્યો છે. સ્ટેટ સેલના બાતમીદારો ક્યા વ્હીકલ નંબરમાં દારૂનો જથ્થો આવી રહ્યો છે તેની બાતમી આપી શકે છે. પરંતુ બુટલેગર અનિલ પાંડ્યાની ટોળકી એક જ નંબરના ત્રણ પેટ્રોલિયમ ટેન્કર અને ટ્રક એક સાથે અને એક સમયે જુદી જુદી બોર્ડરથી ગુજરાતમાં રવાના કરતી હતી. એક જ નંબરના ત્રણ વાહનો ગુજરાતમાં આવે તેમાંથી શેમાં દારૂ હશે તે પકડવું મુશ્કેલ બની જાય તે સ્વાભાવિક છે. આ ગુંચવણ વચ્ચે એક વાહન પકડાય તો બાકીના બે વાહનમાં દારૂ કે અન્ય ગેરકાયદે સામાન ગુજરાતમાં ઘુસાડી દેવાની પંતરાબાજી સફળતાપૂર્વક અમલમાં મુકાઈ હોવાનો ચોંકાવનારો ઘટસ્ફોટ થઈ શકે છે.
આખા ગુજરાતમાં નેટવર્ક ધરાવતા બૂટલેગરે ડીજી સ્કવોડના હેડ કોન્સ્ટેબલને ફોડ્યો હતો
બુટલેગર અનિલ પાંડ્યા કચ્છ-સૌરાષ્ટ્ર સહિત આખા ગુજરાતમાં દારૂનું નેટવર્ક ધરાવતો હતો અને તેણે ડીજી સ્કવોડના એક કોન્સ્ટેબલને ફોડ્યો હોવાનો ઘટસ્ફોટ જુલાઈ 2025માં થયો હતો. વડોદરા ગ્રામ્ય પોલીસે દારૂ પકડતા ડીજી સ્કવોડના હેડ કોન્સ્ટેબલ સાજણ આહિરની સંડોવણીનો પદાફાશ થયો હતો. આ પછી બુટલેગર અનિલ પાંડ્યાએ ઓડિયો ક્લિપ્સ જાહેર કરતાં ખળભળાટ મચી ગયો હતો. એક વર્ષથી બુટેલગર સાથેના મેળાપિપણામાં વડોદરા પાસેથી દારૂ ભરેલી ટ્રક ના રોકાય તે માટે આંગડિયા મારફતે 15 લાખ મેળવનાર હેડ કોન્સ્ટેબલ સાજણને સસ્પેન્ડ કરી ગુનો નોંધી ધરપકડ પણ કરાઈ હતી. દુબઈ બેઠાં-બેઠાં સંચાલન કરી પોતાની ગેંગ મારફતે નવી-નવી પેંતરાબાજીથી ગુજરાતમાં દારૂ ઠાલવતા બૂટલેગર અનિલ પાંડ્યા પાસેથી ડીજી સ્કવોડ શું રહસ્યો ખોલશે? તેના પર બધાની નજર છે.
