Jamnagar Accident : જામનગરમાં જુદા જુદા બે વાહન અકસ્માતોમાં મોટી ઉંમરના બે રાહદારી બુઝુર્ગ વાહનની ઠોકરે ચડ્યા છે, અને બંનેના પગ ભાંગી ગયા હોવાથી સારવાર માટે હોસ્પિટલમાં ખસેડાયા છે. જે મામલે પોલીસ ફરિયાદ નોંધાવવામાં આવી છે.
જામનગરમાં સરદાર નગર શેરી નંબર-1 માં રહેતા દેવાણંદભાઈ દેવાભાઈ નંદાણીયા નામના 65 વર્ષના બુઝુર્ગ કે જેઓ સાંઢીયા પુલ પાસે રોડ ક્રોસ કરી રહ્યા હતા, જે દરમિયાન પૂરપાટ ઝડપે આવી રહેલા નિલેશ વજશીભાઈ ગોજીયા નામના એક બાઈક ચાલકે તેઓને હડફેટમાં લઈ લેતાં જમણો પગ ભાંગી ગયો હતો, અને ફેક્ચર સહિતની ઈજા થઈ છે. જેઓને જી.જી.હોસ્પિટલમાં સારવાર ચાલી રહી છે. પોલીસે બાઈક ચાલક સામે અકસ્માત અંગે ગુન્હો નોંધ્યો છે.
અકસ્માતનો બીજો બનાવ જામનગર નજીક ગુલાબ નગર વિસ્તારમાં મુખ્ય રોડ પર બન્યો હતો. ત્યાંથી દવા લેવા માટે રસ્તો ઓળંગી રહેલા અંબાલાલભાઈ ખાણધર નામના 65 વર્ષના બુઝુર્ગને જી.જે.03 એમએચ 2689 નંબરની કારના ચાલકે હડફેટમાં લઈ પગ ભાંગી નાખતાં તેઓને પણ સારવાર માટે જી.જી.હોસ્પિટલમાં ખસેડવામાં આવ્યા છે. પોલીસે ઇજાગ્રસ્તરના પુત્ર રાજેશ ખાણધરની ફરિયાદના આધારે કારચાલક સામે ગુનો નોંધ્યો છે.
